ԱՄՆ Սենատն օգոստոսյան արձակուրդ է գնացել առանց Թուրքիայում ԱՄՆ դեսպան հաստատելու
ԵՐԵՎԱՆ, 1 ՕԳՈՍՏՈՍԻ, ԱՐՄԵՆՊՐԵՍ: Հայ դատի ԱՄՆ հանձնախումբը ողջունել է Միացյալ Նահանգների Սենատի որոշումը` օգոստոսյան արձակուրդ գնալ առանց Թուրքիայում ԱՄՆ դեսպան հաստատելու: Հայ դատը նշում է, որ սա ԱՄՆ սենատորներին և քաղաքացիներին հնարավորություն կտա վերանայել Ջոն Բասի թեկնածությունը այդ պաշտոնում, ինչպես նաև` գնալով վատթարացող թուրք-ամերիկայն հարաբերությունները: Ինչպես «Արմենպրես»-ին տեղեկացրին Հայ դատի ԱՄՆ հանձնախմբից, Բասի` ԱՄՆ դեսպանի պաշտոնում հաստատելու լսումները ամենաշուտը կլինեն սեպտեմբերի ութին: «Մենք ուրախ ենք, որ ԱՄՆ սենատորներին և քաղաքացիներին լրացուցիչ ժամանակ է տրվել մանրամասն ուսումնասիրել Բասի մտահոգիչ հայտարարությունները»,- նշել է Արամ Համփարյանը:
Հուլիսի 29-ին Սենատի արտաքին հարաբերությունների հանձնաժողովի լսումների ժամանակ Հայ դատի հանձնախումբը մի շարք սենատորների միջոցով հարցեր էր ուղղել Ջոն Բասին` ամեիկահայերին հուզող մի շարք խնդիրների շուրջ: Իր ելույթում դիվանագետը խուսափել էր օսմանյան թուրքերի կողմից հայերի կոտորածները ցեղասպանություն բնութագրել և փոխարենը, կիրառելով «ընդհանուր պատմություն» որակավորումը, գովաբանել թուրք վարչապետ Էրդողանի ապրիլիքսաներեքյան «ցավակցական» ուղերձը հայ ժողովրդին:
Ավելի վաղ Հայ դատի ԱՄՆ հանձնախումբը դեմ էր արտահայտվել Ջոն Բասի թեկնածությանը Թուրքիայում ԱՄՆ դեսպանի պաշտոնում` նշելով. «Հայ դատի ԱՄՆ հանձնախումբը չի կարող սատարել Ջոն Բասի թեկնածությունը` հիմնվելով Սենատում նրա ունեցած ելույթների վրա, որոնք Հայոց ցեղասպանությունը ճանաչելու մասին Նախագահ Օբամայի խախտած խոստման մի մասն են և ավելի են ամրապնդում Թուրքիայի «բերան փակող» գերակայությունն ԱՄՆ կառավարության վրա»:
Բաժանորդագրվեք մեր ալիքին Telegram-ում