ԵՐԵՎԱՆ, 26 ԱՊՐԻԼԻ, ԱՐՄԵՆՊՐԵՍ: Հայաստանի Հանրապետական կուսակցության գերագույն մարմնի եւ խորհրդի նիստերում որոշվել է Ազգային ժողովի նախագահի պաշտոնում առաջադրել Գալուստ Սահակյանի թեկնածությունը: «Արմենպրես»-ի հաղորդմամբ՝ այս մասին հայտարարեց կուսակցության մամուլի քարտուղար, ԱԺ փոխնախագահ Էդուարդ Շարմազանովը:
«Մենք համոզված ենք, որ Գալուստ Սահակյանն իր փորձով, գիտելիքներով լավագույնս կարող է լուծել իր առջև դրված խնդիրները: ԱԺ-ում ՀՀԿ Խմբակցության ղեկավարի հարց չի քննարկվել, կառավարության հարց ևս չի քննարկվել մինչև մայիսի 3-ը ժամանակ կա և մենք մինչ այդ կձևավորենք կառավարության կազմը: Որոշվել է, որ Ազգային ժողովի պետաիրավական հարցերի հանձնաժողովի նախագահ կդառնա Հովհաննես Սահակյանը, իսկ ԵԽԽՎ պատվիրակության ղեկավարը կլինի ԵԽԽՎ նախկին անդամ, ԱԺ նախագահի տեղակալ Հերմինե Նաղդալյանը»,-ասաց Շարմազանովը:Ազգային անվտանգության խորհրդի քարտուղարի հարց կուսակցության նիստում ևս չի քննարկվել:Ազգային ժողովի` ապրիլի 28-ին մեկնարկելիք քառօրյայի օրակարգում ներառված է նաև Ազգային ժողովի նախագահի ընտրության հարցը. կիսատ հարց կա նախորդ նիստից մնացած, որի ավարտից հետո արդեն կքննարկվի ԱԺ նախագահի առաջադրման հարցը և կդրվի քվեարկության:
Ազգային ժողովի նախագահի պաշտոնը թափուր է մնացել Հովիկ Աբրահամյանի` ՀՀ վարչապետ նշանակվելուց հետո: «Ազգային ժողովի կանոնակարգ» ՀՀ օրենքի համաձայն` Ազգային ժողովի նախագահի պաշտոնում պատգամավորների կազմից թեկնածուների առաջադրման իրավունքը պատկանում է պատգամավորներին: Ազգային ժողովի նախագահն ընտրվում է գաղտնի քվեարկությամբ, պատգամավորների ընդհանուր թվի ձայների մեծամասնությամբ:
Գալուստ Գրիգորիի Սահակյանը ծնվել է 1948թ. ապրիլի 8-ին Երեւանում: 1971թ. ավարտել է Երեւանի պետական համալսարանը: Բանասեր է:1970-1972թթ. Երեւանի մետաքսի կոմբինատում եղել է փականագործ: 1972-1991թթ. աշխատել է կրթական համակարգում. թիվ 30 դպրոցում՝ ուսուցիչ, թիվ 94 եւ թիվ 153 դպրոցներում՝ տնօրենի տեղակալ, թիվ 3 եւ թիվ 185 դպրոցներում՝ տնօրեն: 1991-1996թթ. եղել է Երեւանի Մաշտոցի շրջխորհրդի գործկոմի նախագահի տեղակալ, առաջին տեղակալ:
1995-1999թթ.՝ Ազգային ժողովի պատգամավոր (թիվ 32 ընտրատարածք): Ազգային ժողովի գիտության, կրթության, մշակույթի եւ երիտասարդության հարցերի մշտական հանձնաժողովի անդամ: «Հանրապետություն» խմբակցության, ապա «Երկրապահ» պատգամավորական խմբի անդամ:
1999-2003թթ.` Ազգային ժողովի պատգամավոր (համամասնական ընտրակարգ, «Միասնություն» դաշինք): Ազգային ժողովի գիտության, կրթության, մշակույթի եւ երիտասարդության հարցերի մշտական հանձնաժողովի նախագահի տեղակալ: «Միասնություն» խմբակցության անդամ, ապա ղեկավար:
2003-2007թթ.` Ազգային ժողովի պատգամավոր (համամասնական ընտրակարգ, ՀՀԿ): Ազգային ժողովի պետական-իրավական հարցերի մշտական հանձնաժողովի անդամ: ՀՀԿ խմբակցության ղեկավար:
2007-2012թթ.` Ազգային ժողովի պատգամավոր (համամասնական ընտրակարգ, ՀՀԿ): 19.06.2007-17.11.2008թթ.` Ազգային ժողովի պաշտպանության, ազգային անվտանգության եւ ներքին գործերի մշտական հանձնաժողովի անդամ: 11.11.2008-31.05.2012` «Հայաստանի Հանրապետական կուսակցություն» խմբակցության ղեկավար: ՀՀԿ խորհրդի անդամ:
2012թ. մայիսի 6-ին Ազգային ժողովի պատգամավոր է ընտրվել համամասնական ընտրակարգով Հայաստանի Հանրապետական կուսակցությունից:
Ամուսնացած է, ունի երկու երեխա: