Գագիկ Բեգլարյանը Միջխորհրդարանական միության բրիտանական խմբի անդամներին է ներկայացրել խոշոր ճանապարհաշինական ծրագրերը
ԵՐԵՎԱՆ, 19 ՓԵՏՐՎԱՐԻ, ԱՐՄԵՆՊՐԵՍ: ՀՀ տրանսպորտի և կապի նախարար Գագիկ Բեգլարյանը փետրվարի 19-ին հանդիպել է Միջխորհրդարանական միության բրիտանական խմբի անդամներին՝ պատվիրակության ղեկավար Ջոն Ուիթինգդեյլի գլխավորությամբ:
Ինչպես «Արմենպրես»-ին տեղեկացրին ՀՀ տրանսպորտի և կապի նախարարության լրատվական ծառայությունից, հանդիպման ընթացքում Բրիտանիայի Համայնքների և Լորդերի պալատների պատգամավորները նախարար Գագիկ Բեգլարյանը ներկյացրել է Հայաստանում իրականացվող «Հյուսիս-հարավ ճանապարհային միջանցք» և «Հայաստանի հարավային երկաթուղի» խոշոր ծրագրերի ընթացքը:
Խոսելով Իրան-Հայաստան երկաթգծի կառուցման մասին՝ նախարարը նշեց, որ այդ ծրագիրը խոշոր ռազմավարական նշանակություն ունի ինչպես Հայաստանի, այնպես էլ հարևան երկրների համար:
«Այդ ուղղությամբ բավականին աշխատանքներ են կատարվել, պատրաստ է երկաթուղու կառուցման տեխնիկատնտեսական հիմնավորումը: Ծրագիրը հնարավորություն կտա ամենակարճ և հարմարավետ ճանապարհով Ասիան կապել Կենտրոնական Եվրոպային»,-ասաց նախարարը:
Գագիկ Բեգլարյանը ներկայացրեց նաև «Հյուսիս-հարավ» ծրագրի նշանակությունը: Նշվեց, որ 556 կմ երկարություն ունեցող ճանապարհը հնարավորություն կտա բարելավել ճանապարհային կապը Հայաստանի երկու հարևանների՝ Իրանի և Վրաստանի հետ: Նախարարի խոսքով՝ Առաջին և Երկրորդ տրանշերում այժմ ընթանում են կոնկրետ աշխատանքներ, որոնք իրականացնում է իսպանական «Իզոլյուքս կորսան» ընկերությունը:
Հանդիպման ընթացքում նախարարը պատասխանեց նաև բրիտանական խորհրդարանի պատգամավորներին հետաքրքրող` տրանսպորտի և ճանապարհաշինության ոլորտներին առնչվող հարցերին։
Բաժանորդագրվեք մեր ալիքին Telegram-ում