ԵՐԵՎԱՆ, 18 ՆՈՅԵՄԲԵՐԻ, ԱՐՄԵՆՊՐԵՍ: Հայաստանի և Ռուսաստանի միջև, վերջինիս առաջարկով, կստորագրվի միջուկային անվտանգության բնագավառում համագործակցության համաձայնագիր: Ինչպես հաղորդում է «Արմենպրես»-ը` վկայակոչելով ՀՀ կառավարության պաշտոնական կայքը, այդ մասին հարցն ընդգրկված է գործադիրի նոյեմբերի 21-ի նիստի օրակարգում:

Հիմնավորման համաձայն` համաձայնագրի ստորագրումը հնարավորություն կտա համագործակցել միջուկային էներգաբլոկների անվտանգ շահագործման, ՀՀ տարածքում ռուսական նախագծով նոր ատոմային էլեկտրակայանի կառուցման ծրագրի շրջանակներում ՀՀ-ում միջուկային անվտանգության ենթակառուցվածքի զարգացման, ՀՀ ատոմային էներգետիկայի օբյեկներում հնարավոր ճառագայթային վտանգներից արդյունավետ պաշտպանության միջոցների ստեղծման ու պատշաճ պահպանման գործում:

Համաձայնագրով կնախատեսվի նաև միջուկային անվտանգության բնագավառի մասնագետների համար համաձայնեցված ուսումնական ծրագրերի մշակում, մասնագետների պատրաստում, վերապատրաստում և որակավորման բարձրացում: Համաձայնագրի ստորագրումով նախատեսվում է նաև, որ ատոմային էներգիայի բնագավառում երկու երկրների միջև համագործակցությունը կծառայի ատոմային էներգիայի միայն խաղաղ նպատակներով անվտանգ օգտագործմանը:

Սեպտեմբերի 3-ին Մոսկվայում ՀՀ Նախագահ Սերժ Սարգսյանի հետ ասուլիսում ՌԴ Նախագահ Վլադիմիր Պուտինը հայտարարել էր, որ «Ռոսատոմը» հայ մասնագետների հետ համատեղ աշխատելու է Հայկական ատոմակայանի շահագործման ժամկետը ևս տասը տարով՝ մինչև 2026թ., երկարաձգելու նախագծի շուրջ։ Հայկական ատոմակայանի առաջին էներգաբլոկը գործարկվել է 1976թ.-ի դեկտեմբերի 28-ին, երկրորդը՝ 1980թ.-ի հունվարի 5-ին: Մեծամորի ատոմակայանին բաժին է ընկնում Հայաստանում արտադրվող էլեկտրաէներգիայի զգալի մասը: