ԾԱՂԿԱՁՈՐ, 27 ԱՊՐԻԼԻ, ԱՐՄԵՆՊՐԵՍ: Հայաստանի իշխանությունները լուրջ քայլեր են ձեռնարկում` երկրում գիտելիքահենք տնտեսության զարգացման ուղղությամբ: Այս մասին հայտարարեց Հայաստանի Հանրապետության Ազգային ժողովի նախագահ Հովիկ Աբրահամյանը Ծաղկաձորում անցկացվող` Հայաստանի պետական տնտեսագիտական համալսարանի ուսանողական խորհրդի «Տնտեսագիտական նոր միտք» գիտաժողովի ընթացքում։ «Արմենպրես»-ի հաղորդմամբ՝ Հովիկ Աբրահամյանը ողջունեց ուսանողներին ու պրոֆեսորադասախոսական կազմին՝ կարևորելով տնտեսագիտական ոլորտի գիտաժողովների անցկացումը։ «Նման գիտաժողովները հնարավորություն են տալիս ուսանողներին նպաստել տնտեսության զարգացմանը և ճգնաժամների հաղթահարմանը։ Որպեսզի գիտաժողովներն ավելի արդյունավետ լինեն, հարկավոր է գիտաժողովի ընթացքում քննարկված հարցերը գրավոր տեսքով ներկայացնել պատկան մարմիններին»,-ասաց Աբրահամյանը՝ առաջարկելով գիտաժողովի արդյունքում կազմված զեկույցները ուղարկել ՀՀ կառավորություն։

ԱԺ նախագահի կարծիքով՝ տնտեսական ճգնաժամը Հայաստանում դեռևս հաղթահարված չէ և հարկավոր է տնտեսագիտական կրթությունն օգտագործել ի նպաստ ճգնաժամի հաղթահարմանը։ «Տնտեսագիտական կրթությունն ավելի արդյունավետ դարձնելու համար առաջարկում եմ ՀՊՏՀ-ի ուսանողներին ու դասախոսներին մի քանի դաս անցկացնել Ազգային ժողովում: Դասերին իրենց գիտելիքներն ու փորձը կփոխանցեն խորհրդարանի տնտեսական հանձնաժողովի անդամները և ներկայացուցիչներ Կառավարությունից»,-ասաց Աբրահամյանը։

«Տնտեսագիտական նոր միտք» գիտաժողովը կրում էր «ՀՀ տնտեսության զարգացման մարտահրավերներն ու խոչընդոտները» խորագիրը։ Գիտաժողովին մասնակցում էին ուսանողական և պրոֆեսորադասախոսական անձնակազմի 100 ներկայացուցիչներ։ Գիտաժողովի նպատակն է ուսումնասիրել Հայաստանի տնտեսության առկա վիճակը, զարգացման հեռանկարներն ու խոչընդոտները՝ օգտագործելով երիտասարդ տնտեսագետների մտավոր ներուժը և զարգացնել ուսանողների մասնագիտական որակները։ Ուսանողները հնարավորություն ունեցան ունկնդրել հրավիրված տնտեսագետների դասախոսությունները։ Ուսանողներն իրենց հերթին հանդես եկան զեկույցներով, որը գնահատվեց պրոֆեսինալ ժյուրիի կողմից։