Լավագույն գիտական եւ ստեղծագործական աշխատանքների մրցույթը կամփոփվի հուլիսին
ԵՐԵՎԱՆ, 27 ՀՈՒԼԻՍԻ, ԱՐՄԵՆՊՐԵՍ: Համաշխարհային հայկական կոնգրեսի եւ Ռուսաստանի հայերի միության կողմից 2007 թվականից անցկացվող գիտական եւ ստեղծագործական լավագույն աշխատանքների մրցանակաբաշխության արդյունքները կամփոփվեն օրերս:
Մրցանակաբաշխությանը կմասնակցեն ՀՀ, ԼՂՀ եւ սփյուռքահայ մտավորականության ներկայացուցիչներ:
«Արմենպրես»-ի հաղորդմամբ` ինչպես հուլիսի 27-ին լրագրողների հետ հանդիպմանը նշեց ԳԱԱ նախագահ Ռադիկ Մարտիրոսյանը` Ռուսաստանի հայերի միությունը ստեղծման իսկ օրից օժանդակել է Հայաստանի գիտական եւ աշխատանքի արդյունավետության բարձրացմանը:
«Մրցանակաբաշխությունը հնարավորություն կտա մասնակիցներին որոշակի նյութական աջակցություն ստանալ իրենց կատարած աշխատանքների համար»,-ասաց նա:
Գրողների միության նախագահ Լեւոն Անանյանի խոսքով` քանի որ մանկական գրականությունը հետընթաց է ապրում, ուստի այս տարի մրցանակաբաշխությանը շեշտադրվելու է հատկապես «Մանկապատենական գրականություն» անվանակարգը, ընտրվելու են նաեւ արձակ, պոեզիա, դրամատուրգիա ժանրերում ներկայացված լավագույն ստեղծագործությունները:
«Մրցանակաբաշխության 5 տարիների ընթացքում 15 գրական գործ է հաղթել, որոնցից 20 տոկոսը թարգմանվել է, եւ սա ապացուցում է հանձնաժողովի անդամների անաչառ ընտրությունը»,-ասաց նա:
Գրականության հանձնաժողովի նախագահ Աելիտա Դոլուխանյանը նշեց, որ հանձնաժողովը բացառում է ծանոթություն, միջնորդություն:
«Մրցանակաբաշխությանը ներկայացված բոլոր գործերը կարդացվում են եւ քննարկվում հանձնաժողովի բացառապես բոլոր անդամների կողմից»,-ասաց նա:
«Մրցանակաբաշխություն 2013»-ի նպատակն է խթանել երկրի մտավոր կյանքի աշխուժացումը:
Անցած տարիների ընթացքում լավագույն գիտական աշխատանքների մրցույթին մասնակցել են մտավորականության շուրջ 1250 ներկայացուցիչներ, որոնցից ավելի քան 150-ը դարձել են մրցանակակիրներ:
Բաժանորդագրվեք մեր ալիքին Telegram-ում