1 წუთი კითხვის
სომხეთის პრემიერ-მინისტრი ნიკოლ ფაშინიანი ყირგიზეთის რესპუბლიკაში ჩავიდა.
„არმენპრესის“ ცნობით, პრემიერ-მინისტრმა ამის შესახებ „ფეისბუქის“ საკუთარ გვერდზე დაწერა და ვიდეოც გამოაქვეყნა.
„ორდღიანი სამუშაო ვიზიტით ყირგიზეთის რესპუბლიკაში ჩავედი“, - დაწერა ფაშინიანმა.
ბიშკეკის საერთაშორისო აეროპორტში სომხეთის რესპუბლიკის პრემიერ-მინისტრს ყირგიზეთის მინისტრთა კაბინეტის თავმჯდომარის პირველი მოადგილე დანიარ ამანგელდიევი დახვდა.
პრემიერ-მინისტრი ყირგიზეთის დედაქალაქ ბიშკეკში შანხაის თანამშრომლობის ორგანიზაციის სამიტის „შთო+“ ფორმატის შეხვედრასა და მის ფარგლებში დაგეგმილ ღონისძიებებში მიიღებს მონაწილეობას.
ბიშკეკში ასევე დაგეგმილია სომხეთის რესპუბლიკის პრემიერ-მინისტრ ნიკოლ ფაშინიანისა და რუსეთის ფედერაციის პრეზიდენტ ვლადიმირ პუტინის შეხვედრა. გათვალისწინებულია სომხეთის პრემიერ-მინისტრის ორმხრივი შეხვედრები სხვა პარტნიორებთანაც.