სომხეთის საგარეო საქმეთა მინისტრის მოადგილე TRIPP-ის პროექტში რუსეთის შესაძლო მონაწილეობის საკითხს გამოეხმაურა

სომხეთის საგარეო საქმეთა მინისტრის მოადგილე მნაცაკან საფარიანი გამოეხმაურა რუსული მხარის განცხადებებს იმის შესახებ, რომ პროექტი TRIPP მხოლოდ მოიგებს, თუ მასში რუსეთიც მიიღებს მონაწილეობას.

„არმენპრესის“ ცნობით, პარლამენტში ჟურნალისტებთან საუბრისას მნაცაკან საფარიანმა აღნიშნა, რომ ამ ეტაპზე TRIPP-ი სომხეთ-აშშ-ის ფორმატში ხორციელდება, გაფორმებულია შეთანხმება და პროექტი იმპლემენტაციის ფაზაშია.

კითხვაზე, მიიჩნევს თუ არა სომხური მხარე შესაძლებლად მომავალში TRIPP-ის პროექტში რუსეთის რაიმე ფორმით ჩართულობის საკითხის განხილვას, საფარიანმა უპასუხა: „ამ ეტაპზე მომავალზე საუბრისგან თავს შევიკავებდი“. მან ასევე დასძინა, რომ ამ დროისთვის პროექტში რუსული მხარის ჩართვის საკითხი არ განიხილება და ის დღის წესრიგში არ დგას.

რაც შეეხება კითხვას, თუ რა ფორმატით განხორციელდება ტრანზიტი TRIPP-ის ფარგლებში, იმის გათვალისწინებით, რომ სომხეთი ევრაზიული ეკონომიკური კავშირის წევრია, საგარეო უწყების ხელმძღვანელის მოადგილემ განაცხადა: „ამჟამად სომხეთი ეეკ-ის წევრია და ტრანზიტის წესები ეეკ-ის რეგულაციებით განისაზღვრება“. მან დადებითად უპასუხა რეპლიკას იმის შესახებ, ნიშნავს თუ არა ეს, რომ TRIPP-იც ეეკ-ის წესებით იმოქმედებს.

ცნობისთვის, რუსეთის საგარეო საქმეთა მინისტრის მოადგილემ, მიხეილ გალუზინმა ცოტა ხნის წინ განაცხადა, რომ პროექტი TRIPP-ი მხოლოდ მოიგებს, თუ მასში რუსეთი მიიღებს მონაწილეობას. მან დაუშვა, რომ TRIPP-ის მარშრუტი რუსული სარკინიგზო ლიანდაგის სიგანით უნდა აშენდეს, რათა აზერბაიჯანთან შეუფერხებელი კავშირი უზრუნველყოს. გალუზინმა შეახსენა ყველას, რომ სომხეთის რკინიგზას მართავს დახურული სააქციო საზოგადოება „სამხრეთ კავკასიის რკინიგზა“, რომელიც „რუსეთის რკინიგზის“ შვილობილი კომპანიაა.

„სომხეთის ტერიტორიაზე ტრანზიტი, მათ შორის ევრაზიული ეკონომიკური კავშირის ნაწილში, უნდა განხორციელდეს ეეკ-ის ნორმებისა და რეგულაციების შესაბამისად, რომლის დატოვებასაც, როგორც თავად აცხადებენ, სომხეთი არ აპირებს. ბოლოს და ბოლოს, „ტრამპის გზა“ გაივლის იმ ტერიტორიაზე, რომელსაც რუსი მესაზღვრეები იცავენ, რომლებიც ათწლეულების განმავლობაში სომეხ კოლეგებთან ერთად იცავენ სომხეთის საზღვრებს თურქეთსა და ირანთან. ასე რომ, ასე თუ ისე, რუსეთის აზრი გასათვალისწინებელია, ისევე როგორც ევრაზიული ეკონომიკური კავშირისა. აქედან გამომდინარე, მიგვაჩნია, რომ პროექტი რუსეთის მონაწილეობით მხოლოდ მოიგებს“, - აღნიშნა მიხეილ გალუზინმა.