მაკრონმა ფაშინიანს ეროვნული ასამბლეის არჩევნებში გამარჯვების მილოცვის გზავნილი გაუგზავნა

საფრანგეთის პრეზიდენტმა ემანუელ მაკრონმა სომხეთის პრემიერ-მინისტრ ნიკოლ ფაშინიანს ეროვნული ასამბლეის არჩევნებში პარტია „სამოქალაქო ხელშეკრულების“ გამარჯვება მიულოცა.

„არმენპრესის“ ცნობით, ამის შესახებ საფრანგეთის პრეზიდენტმა X-ის საკუთარ მიკრობლოგში გამოქვეყნებულ პოსტში აღნიშნა.

„ძვირფასო ნიკოლ ფაშინიან, გულწრფელად გილოცავთ საპარლამენტო არჩევნებში ამ შთამბეჭდავ გამარჯვებას. მოუთმენლად ველი თქვენთან ერთად დაწყებული საქმის გაგრძელებას ჩვენი ხალხების საკეთილდღეოდ ჩვენი თანამშრომლობის განსამტკიცებლად, სომხეთის მშვიდობისა და სუვერენიტეტის დასაცავად, ისევე როგორც ევროპასთან უფრო მჭიდრო კავშირების დასამყარებლად“, - დაწერა ემანუელ მაკრონმა.

სომხეთში გამართული საპარლამენტო არჩევნების წინასწარი შედეგებით, საკანონმდებლო ორგანოში 4 პოლიტიკური სუბიექტი შედის: პარტია „სამოქალაქო ხელშეკრულება“ - 727 ათას 160 ხმით (49.81%), ბლოკი „ძლიერი სომხეთი“ - 340 ათას 62 ხმით (23.29%), ბლოკი „სომხეთი“ - 145 ათას 97 ხმით (9.94%) და პარტია „კეთილდღეობითი სომხეთი“ - 58 ათას 368 ხმით (4%). სომხეთის პრემიერ-მინისტრმა ნიკოლ ფაშინიანმა უკვე განაცხადა, რომ ხმების ამგვარი თანაფარდობით, პარტია „სამოქალაქო ხელშეკრულება“ ეროვნულ ასამბლეაში უმრავლესობას მოიპოვებს და მთავრობას ჩამოაყალიბებს.