ჩვენ განვაგრძობთ ევროკავშირთან დაახლოებას და ევრაზიულ ეკონომიკურ კავშირში მონაწილეობასა და წევრობას: ნიკოლ ფაშინიანი
2 წუთი კითხვის
სომხეთი განაგრძობს ევროკავშირთან დაახლოების კურსს, თუმცა ასევე გააგრძელებს მონაწილეობასა და წევრობას ევრაზიულ ეკონომიკურ კავშირში, კვლავაც განავითარებს ურთიერთობებს რუსეთსა და ევრაზიული ეკონომიკური კავშირის სხვა წევრ ქვეყნებთან.
„არმენპრესის“ ცნობით, ამის შესახებ ნიკოლ ფაშინიანმა პრესკონფერენციაზე განაცხადა, რითაც უპასუხა გამოცემა „იზვესტიას“ კითხვას იმის შესახებ, აპირებს თუ არა სომხეთის ხელისუფლება ევროკავშირთან დაახლოების კურსის გაგრძელებას.
„ჩვენ განვაგრძობთ ევროკავშირთან დაახლოების კურსს, თუმცა ასევე გავაგრძელებთ მონაწილეობასა და წევრობას ევრაზიულ ეკონომიკურ კავშირში, კვლავაც განვავითარებთ ურთიერთობებს რუსეთსა და ევრაზიული ეკონომიკური კავშირის სხვა წევრ ქვეყნებთან. ჩვენ, რა თქმა უნდა, ხელს შევუწყობთ კავშირების განმტკიცებას ევრაზიული ეკონომიკური კავშირის ფარგლებში“, - აღნიშნა ფაშინიანმა.
კითხვაზე, ესაუბრა თუ არა დასავლელ ლიდერებს სომხეთში გამართული საპარლამენტო არჩევნების წინასწარი შედეგების გამოქვეყნების შემდეგ, ფაშინიანმა განაცხადა, რომ უკვე ჰქონდა არაფორმალური საუბარი საფრანგეთის პრეზიდენტ ემანუელ მაკრონთან.
მან დასძინა, რომ არაფორმალური საუბარი ასევე გამართა საქართველოს პრემიერ-მინისტრ ირაკლი კობახიძესთან.