ჩვენ აზერბაიჯანთან მშვიდობის ინსტიტუციონალიზაცია უნდა მოვახდინოთ, თურქეთთან საზღვარი კი უნდა გაიხსნას: ნიკოლ ფაშინიანი
2 წუთი კითხვის
სომხეთის ხალხმა დასრულებულ საპარლამენტო არჩევნებზე ხმა მშვიდობას, რეგიონულ განვითარებასა და თანამშრომლობას მისცა.
„არმენპრესის“ ცნობით, ამის შესახებ სომხეთის პრემიერ-მინისტრმა ნიკოლ ფაშინიანმა პრესკონფერენციაზე განაცხადა, რითაც უპასუხა თურქი ჟურნალისტის კითხვას იმის შესახებ, თუ რა გზავნილი აქვს მას თურქეთისა და აზერბაიჯანისთვის სომხეთში საპარლამენტო არჩევნების დასრულების შემდეგ.
„სომხეთის ხალხმა დასრულებულ საპარლამენტო არჩევნებზე ხმა მშვიდობას, რეგიონულ განვითარებასა და თანამშრომლობას მისცა. იმედი მაქვს, რომ როგორც თურქეთის, ისე აზერბაიჯანის მხრიდან ამას პოზიტიური გამოხმაურება მოჰყვება. ჩვენ უნდა მოვახდინოთ სომხეთსა და აზერბაიჯანს შორის მშვიდობის ინსტიტუციონალიზაცია და უნდა გავხსნათ ჩვენი საზღვარი თურქეთთან - ვგულისხმობ იმას, რომ თურქეთმა უნდა გახსნას საზღვარი. ასევე, უნდა დავამყაროთ დიპლომატიური ურთიერთობები. სხვათა შორის, მადლობელი ვართ ახალქალაქი-ყარსის რკინიგზის სომხური საქონლის იმპორტ-ექსპორტისთვის გახსნის გადაწყვეტილების გამო. თურქეთთან ძალიან კარგი დინამიკა გვაქვს, თუმცა ეს დინამიკა უნდა გავაგრძელოთ დიპლომატიური ურთიერთობების დასამყარებლად და სრულად გახსნილი საზღვრის ქონისთვის“, - აღნიშნა ფაშინიანმა.
პრემიერ-მინისტრმა შეახსენა დამსწრეებს, რომ სომხეთმა და აზერბაიჯანმა სამშვიდობო შეთანხმების პარაფირება უკვე მოახდინეს. „ჩვენ ხელი უნდა მოვაწეროთ მას. რაც შეიძლება მალე უნდა დავიწყოთ პროექტი TRIPP, რომელიც რეგიონული გარდამტეხი პროექტია. ეს ნიშნავს, რომ ჩვენი რეგიონის ბლოკადა დაძლეულია და ეს ძალიან დიდი სიახლეა, რადგან ჩვენი რეგიონი ჩიხიდან გზაჯვარედინად იქცევა“, - განაცხადა სომხეთის პრემიერმა.