სომხეთიდან პირველად იქნა ექსპორტირებული მილიონობით დოლარის ღირებულების სომხური იარაღი
2 წუთი კითხვის
პირველად სომხეთიდან განხორციელდა მილიონობით დოლარის ღირებულების სომხური წარმოების იარაღის ექსპორტი.
„არმენპრესის“ ცნობით, ამის შესახებ სომხეთის მაღალი ტექნოლოგიების მრეწველობის მინისტრმა მხითარ ჰაირაპეტიანმა განაცხადა.
„რამდენიმე წლის წინ ძალიან რთული წარმოსადგენი იყო, რომ სომხეთი იარაღის ექსპორტიორი ქვეყანა გახდებოდა. ბოლო თვეებში სხვადასხვა შემთხვევებში, ჩემს საჯარო გამოსვლებსა თუ ინტერვიუებში აღმინიშნავს, რომ რამდენიმე ადგილობრივმა მწარმოებელმა, სომხურმა კომპანიამ მიიღო იარაღის ექსპორტის ნებართვა. ახლა კი მინდა დიდი სიხარულითა და სიამაყით გაცნობოთ, რომ მაისის თვეში სამმა სომხურმა კომპანიამ ორ სხვადასხვა ქვეყანაში განახორციელა იარაღის ექსპორტი. საკმაოდ რთული გამოწვევებისა და ლოგისტიკური სირთულეების დაძლევის შემდეგ, სომხურმა კომპანიებმა შეძლეს დანიშნულების წერტილამდე მიღწევა. სომხურმა კომპანიებმა პირველად შეძლეს სომხეთში შემუშავებული და წარმოებული საბოლოო პროდუქტის მიწოდება საბოლოო მომხმარებელ ქვეყნებში. მინდა ვთქვა, რომ ეს ყველაფერი ბოლო წლებში სომხეთის მთავრობის ოცნებასა და ერთ-ერთ სტრატეგიულ პრიორიტეტს წარმოადგენდა. სწორედ ამიტომ ჩადო მთავრობამ ბოლო წლებში მილიარდობით დრამის ინვესტიცია სამხედრო მრეწველობის სექტორში და მომავალშიც გააგრძელებს ამის კეთებას. კიდევ ერთხელ ვულოცავ ყველას და მინდა შეგახსენოთ, რომ ეს მხოლოდ დიდი და გრძელი გზის დასაწყისია“, - განაცხადა ჰაირაპეტიანმა.