არმენ გრიგორიანმა და ქევინ ჰემილთონმა სომხეთი-ნატოს ურთიერთობების განვითარების პერსპექტივები განიხილეს

სომხეთის რესპუბლიკის უშიშროების საბჭოს მდივანმა არმენ გრიგორიანმა კავკასიასა და ცენტრალურ აზიაში ნატო-ს გენერალური მდივნის სპეციალურ წარმომადგენელს, ქევინ ჰემილთონს უმასპინძლა.

უშიშროების საბჭოს მდივანმა სპეციალურ წარმომადგენელს საპასუხისმგებლო თანამდებობის დაკავება მიულოცა და ნაყოფიერი საქმიანობა და შემდგომი წარმატებები უსურვა.

„არმენპრესის“ ცნობით, სომხეთის უშიშროების საბჭოს აპარატი იტყობინება, რომ თანამოსაუბრეებმა სომხეთი-ნატოს ურთიერთობების მიმდინარე დღის წესრიგი და განვითარების პერსპექტივები განიხილეს.

არმენ გრიგორიანმა ხაზი გაუსვა სომხეთსა და ნატო-ს შორის ორმხრივი ურთიერთობების განმტკიცების პოზიტიურ დინამიკას.

თავის მხრივ, ქევინ ჰემილთონმა მნიშვნელოვნად მიიჩნია ნატო-ს სამშვიდობო მისიებში სომხეთის ჩართულობის შედეგად ჩამოყალიბებული თანამშრომლობა.

შეხვედრის განმავლობაში მხარეებმა ასევე აზრები გაცვალეს რეგიონულ და საერთაშორისო უსაფრთხოებასთან დაკავშირებულ საკითხებზე.