სომხეთი მიესალმა ისრაელსა და ლიბანს შორის ცეცხლის შეწყვეტას

სომხეთის რესპუბლიკის საგარეო საქმეთა სამინისტრომ განცხადება გაავრცელა, რომელშიც მიესალმა ისრაელსა და ლიბანს შორის დადებულ 10-დღიან ზავს.

როგორც „არმენპრესი“ იტყობინება, ამის შესახებ აღნიშნულია საგარეო უწყების მიერ „X“-ის მიკრობლოგში გამოქვეყნებულ პოსტში.

We welcome 10-day ceasefire in #Lebanon, achieved through @POTUS's mediation efforts,as an important step towards de-escalation.

We hope that this development will contribute to comprehensive & sustainable peace in the region with respect of territorial integrity of the parties.

— MFA of Armenia🇦🇲 (@MFAofArmenia) April 17, 2026

„ჩვენ მივესალმებით ლიბანში 10-დღიან ზავს, რომელიც მიღწეულ იქნა აშშ-ის პრეზიდენტ დონალდ ტრამპის შუამავლობითი ძალისხმევის წყალობით, როგორც მნიშვნელოვანი ნაბიჯი დეესკალაციისკენ“, - ნათქვამია საგარეო საქმეთა სამინისტროს განცხადებაში.

სომხეთის საგარეო პოლიტიკურმა უწყებამ ასევე იმედი გამოთქვა, რომ ეს მოვლენა ხელს შეუწყობს რეგიონში ყოვლისმომცველ და სტაბილურ მშვიდობას, მხარეთა ტერიტორიული მთლიანობის პატივისცემით.

უფრო ადრე აშშ-ის პრეზიდენტმა დონალდ ტრამპმა განაცხადა, რომ ისრაელისა და ლიბანის ხელისუფლებამ 10-დღიანი ზავი შეათანხმა. ისრაელი 1,5 თვის განმავლობაში ახორციელებდა დარტყმებს ლიბანზე ირანის მიერ მხარდაჭერილი „ჰეზბოლას“ მოძრაობის წინააღმდეგ ბრძოლის ფარგლებში. ისრაელის დარტყმების შედეგად ლიბანში დაახლოებით 2200 ადამიანი დაიღუპა.

ირანის საგარეო საქმეთა მინისტრმა აბას არაღჩიმ 17 აპრილს განაცხადა, რომ აშშ-თან ორკვირიანი ზავის დარჩენილ პერიოდში, ლიბანში მიღწეული ცეცხლის შეწყვეტის გათვალისწინებით, ირანი ჰორმუზის სრუტეს ყველა სავაჭრო გემისთვის სრულად ღიად აცხადებს.

ლიბანის პრეზიდენტმა ჟოზეფ აუნმა განაცხადა, რომ ქვეყნის ხელისუფლება ისწრაფვის ისრაელთან ცეცხლის შეწყვეტის რეჟიმის განმტკიცებისა და ქვეყნის მთელ ტერიტორიაზე კონტროლის აღდგენისკენ.