2 წუთი კითხვის
სომხეთის პრემიერ-მინისტრი ნიკოლ ფაშინიანი და რუსეთის პრეზიდენტი ვლადიმერ პუტინი, 1 აპრილს მოსკოვში გამართული შეხვედრისას, ივნისის მეორე ნახევარში კიდევ ერთი შეხვედრის გამართვაზე შეთანხმდნენ. „არმენპრესის“ ცნობით, ამის შესახებ პრემიერ-მინისტრმა ნიკოლ ფაშინიანმა ჟურნალისტებთან ბრიფინგზე განაცხადა.
„როგორც ვთქვი, ამ ვიზიტს ძალიან წარმატებულად ვაფასებ. რაც შეეხება პირისპირ შეხვედრას, ჩვენ უკვე შევთანხმდით ჩვენს მომავალ შეხვედრებსა და ღონისძიებებზე. მაღალი დონის შეხვედრაზე შევთანხმდით ივნისის მეორე ნახევარში“, - განაცხადა პრემიერ-მინისტრმა.
პრემიერმა ხაზგასმით აღნიშნა, რომ სომხეთისა და რუსეთის ურთიერთობები კონსტრუქციული ტრანსფორმაციის ეტაპზეა.
„ამ პროცესს დადებითად ვაფასებ და ჩვენს პრინციპს მუდმივად დავიცავთ. ჩვენ არ გამოვალთ მეგობრული დიალოგის ლოგიკიდან და ამ გზას გავაგრძელებთ“, - აღნიშნა მთავრობის მეთაურმა.
ნიკოლ ფაშინიანი ასევე შეეხო ევრაზიული ეკონომიკური კავშირისა და ევროკავშირის თავსებადობის შესახებ მოსაზრებებს.
„სანამ არსებობს იმ პოლიტიკის შეთავსების შესაძლებლობა, რომელსაც ევრაზიული ეკონომიკური კავშირისა და ევროკავშირის მიმართულებით ვატარებთ, ჩვენ ამ პოლიტიკას შევათავსებთ. როდესაც დადგება შეუთავსებლობის მომენტი, გადაწყვეტილებებს ხალხთან ერთად მივიღებთ“, - განაცხადა პრემიერ-მინისტრმა.
სომხეთის პრემიერ-მინისტრმა დაამატა, რომ რუსეთის პრეზიდენტ ვლადიმერ პუტინთან შეთანხმება მაღალი დონის შეხვედრის გამართვის შესახებ ივნისის მეორე ნახევრისთვის უკვე მიღწეულია.