ჩვენ არ შეგვიძლია მივიღოთ გადაწყვეტილებები, რომლებიც საფრთხეს შეუქმნის დამყარებულ მშვიდობას - ფაშინიანი

სომხეთის პრემიერ-მინისტრის, ნიკოლ ფაშინიანის განცხადებით, მთავრობას არ შეუძლია მიიღოს გადაწყვეტილებები, რომლებიც შეარყევს აზერბაიჯანთან დამყარებულ მშვიდობას. „არმენპრესის“ ცნობით, ამის შესახებ ნიკოლ ფაშინიანმა განაცხადა ფორუმზე „ინკლუზიური განვითარება: მიღწევები და სამომავლო გეგმები“, სადაც ყარაბაღიდან იძულებით გადაადგილებულ პირთა პრობლემების გადაჭრის საკითხებს შეეხო.

„ჩვენ არ შეგვიძლია მივიღოთ ისეთი გადაწყვეტილებები, რომლებიც შეარყევს ან დაანგრევს აზერბაიჯანთან დამყარებულ მშვიდობას და დაგვაბრუნებს კონფლიქტის ლოგიკაში“, - აღნიშნა პრემიერმა.

მისივე თქმით, ყარაბაღიდან დევნილ პირებს, სომხეთის რესპუბლიკის სახით, აქვთ სახელმწიფო. „უნდა დასრულდეს ხეტება და ლტოლვილობა. ჩვენი მთელი სტრატეგია დაფუძნებულია იმაზე, რომ თქვენ - როგორც ფიზიკური, ისე ფსიქოლოგიური გაგებით - დამკვიდრდეთ სომხეთში. ჩვენ კი ერთად ეს სახელმწიფო, რომელიც სომეხი ხალხის დიდი ბედნიერებაა, გავხადოთ უფრო კეთილდღეური, დაცული და უსაფრთხო. საბოლოოდ, გადავიდეთ გადარჩენის ლოგიკიდან კეთილდღეობის, განვითარებისა და მშვიდობის ლოგიკაზე“, - განაცხადა ფაშინიანმა.