3 წუთი კითხვის
სომხეთის ტერიტორიაზე „ტრამპის გზა საერთაშორისო მშვიდობისა და კეთილდღეობისკენ“ (Trump Route for International Peace and Prosperity - TRIPP) პროექტის განხორციელებისთვის პირველ ეტაპზე აუცილებელია ნორმატიული წერილობითი ბაზის შექმნა.
„არმენპრესის“ ინფორმაციით, ამის შესახებ განაცხადა სომხეთის პრემიერ-მინისტრმა ნიკოლ ფაშინიანმა საერთაშორისო კონფერენციაზე, სათაურით „მშვიდობის გზაჯვარედინი: რეგიონული კომუნიკაციების და თანამშრომლობის განვითარება“.
„გვსურს შეგახსენოთ, რომ ამ ბაზის შექმნის პირველი ეტაპი არის ვაშინგტონის დეკლარაცია, სადაც აღწერილია საერთო ჩარჩო. შემდეგი ნაბიჯი იქნება სომხეთისა და აშშ-ის მიერ ერთობლივი კომპანიის შექმნა. იქნება დირექტორთა საბჭო, რომელიც კომპანიას მართავს. დირექტორთა საბჭოში წარმოდგენილი იქნებიან სომხეთი და შეერთებული შტატები. საბჭოში ხმების განაწილება დამოკიდებული იქნება წილებზე, რომელთა შესახებაც ამჟამად მიმდინარეობს განხილვები, მაგრამ მნიშვნელოვანია აღინიშნოს, რომ სტრატეგიული მნიშვნელობის საკითხებზე სომხეთს ექნება გადამწყვეტი ხმის უფლება“, - განაცხადა პრემიერ-მინისტრმა.
ფაშინიანის თქმით, პროექტი შედგება რამდენიმე კომპონენტისგან რკინიგზა, ელექტროგადამცემი ხაზები, მილსადენები, კაბელები და სხვა სატრანსპორტო კომუნიკაციები, თუმცა ეს ყველაფერი ერთ ადგილზე არ იქნება განთავსებული.
„რკინიგზის შემთხვევაში შეიძლება გარკვეულად ითქვას, თუ სად გაივლის იგი, ეს არის ჩვენი სამხრეთის რკინიგზა, რომელიც არსებობდა საბჭოთა კავშირის პერიოდში, პირობითად ნრნაძორ–ქარჯივანის მონაკვეთებზე, რაც ასევე მითითებულია „მშვიდობის გზაჯვარედინის“ პროექტში. სხვა ადგილზე პრაქტიკულად შეუძლებელია რკინიგზის განთავსება“, - აღნიშნა ფაშინიანმა.
სომხეთის პრემიერ-მინისტრმა ნიკოლ ფაშინიანმა, აშშ-ის პრეზიდენტმა დონალდ ტრამპმა და აზერბაიჯანის პრეზიდენტმა ილჰამ ალიევმა 8 აგვისტოს ვაშინგტონში ხელი მოაწერეს დეკლარაციას, რომლის 4-ე პუნქტი განსაზღვრავს:
„სომხეთის რესპუბლიკა ითანამშრომლებს ამერიკის შეერთებულ შტატებთან და ურთიერთშეთანახმებულ მესამე მხარეებთან „ტრამპის გზა საერთაშორისო მშვიდობისა და კეთილდღეობისკენ“ (TRIPP) განხორციელების ჩარჩოს განსაზღვრის მიზნით სომხეთის რესპუბლიკის ტერიტორიაზე. ჩვენ ვადასტურებთ ჩვენს მზადყოფნას სამართლიანად შევასრულოთ ყველა აუცილებელი ნაბიჯი, რათა ამ მიზანს მაქსიმალურად სწრაფად მივაღწიოთ“.