მშვიდობის გზაზე პრობლემური საკითხები იქნება, მაგრამ უნდა მოვახერხოთ ყურადღების კონცენტრირება რეალურ მიღწევებზე։ რუბენ რუბინიანი

სომხეთის რესპუბლიკის ეროვნული ასამბლეის თავმჯდომარის მოადგილე რუბენ რუბინიანი მიიჩნევს, რომ აზერბაიჯანთან მშვიდობის გზაზე აუცილებლად იქნება როგორც პრობლემური საკითხები, ისე სადავო განცხადებები, თუმცა აუცილებელია კონცენტრაცია რეალურ პროგრესზე.

როგორც „არმენპრესი“ იუწყება, რუბინიანმა ასეთი მოსაზრება გამოთქვა პარლამენტში ჟურნალისტებთან საუბრისას, კომენტირებისას აზერბაიჯანის პრეზიდენტ ილჰამ ალიევის ბოლო განცხადებებზე, რომლის თანახმადაც თითქოს ცარისტული რუსეთის რუკებზე XX საუკუნის დასაწყისში სომხეთის დღევანდელი ტერიტორიის უმეტეს ტოპონიმს აზერბაიჯანული წარმომავლობა ჰქონდა.

რუბინიანმა აღნიშნა, რომ უკვე გამოეხმაურა ამ უსაფუძვლო განცხადებებს სოციალურ ქსელში გაკეთებული პოსტით.

„გარდა ამისა, 8 აგვისტოს ვაშინგტონის შეთანხმების შემდეგ ვხედავთ ცვლილებას აზერბაიჯანიდან მომავალი განცხადებების ტონში. რა თქმა უნდა, კვლავაც გვხვდება ისეთი განცხადებები, რომლებიც ჩვენთვის არაკონსტრუქციულად ითვლება, და ეს განცხადებაც მათ შორისაა. თუმცა, თუ ისტორიაში დავბრუნდებით, ტოპონიმების თვალსაზრისით ჩვენთვის ეს სრულიად არ იქნება წამგებიანი, პირიქით, შეიძლება მეტადაც კი მომგებიანი აღმოჩნდეს. მაგრამ წარსულში დაბრუნება არ ღირს, უნდა წავიდეთ წინ. ეს არის გზა მშვიდობის განმტკიცებისა და შენარჩუნებისთვის“, - განაცხადა რუბინიანმა.

მშვიდობის პროცესთან დაკავშირებულ შეფასებებზე საუბრისას მან ხაზი გაუსვა, რომ მშვიდობის რეალური ნიშანი სწორედ ისაა, რომ რუსული ხორბალი სარკინიგზო გზით აზერბაიჯანის ტერიტორიის გავლით სომხეთში შემოდის. რუბინიანმა ასევე აღნიშნა, რომ აზერბაიჯანის გავლით სომხეთში ყაზახური ხორბალიც იწოდება.

„ეს ისტორიული მოვლენაა, მსგავსი რამ ალბათ ბოლოს 1991 ან 1992 წელს მოხდა, ანუ ომის აქტიურ ფაზამდე“, - აღნიშნა ეროვნული ასამბლეის თავმჯდომარის მოადგილემ.

რუბინიანმა ხაზი გაუსვა, რომ ბოლო 30 წლის განმავლობაში ერთადერთი ქვეყანა, რომელთანაც სომხეთს რკინიგზით ჰქონდა კავშირი, საქართველო იყო.

„დიახ, მშვიდობის გზაზე იქნება პრობლემური საკითხები, დიახ, შეიძლება იყოს განცხადებები, რომლებიც ჩვენთვის პრობლემურად ჩანდეს, მაგრამ აუცილებელია ყურადღების გამახვილება რეალურ მიღწევებზე. აზერბაიჯანის გავლით სომხეთში ხორბლის იმპორტი ძალიან მნიშვნელოვანი ფაქტია, რომელიც უნდა დაფიქსირდეს, მათ შორის მშვიდობის კონტექსტშიც. ჩვენ გვაქვს ისტორიული შანსი, რომ დამყარებული მშვიდობა დავაინსტიტუციონალოთ, გავხადოთ იგი შეუქცევადი და ხანგრძლივი“, - აღნიშნა რუბენ რუბინიანმა.