ფაშინიანმა მიმართა აზერბაიჯანის წინაპირობას სომხეთის რესპუბლიკის კონსტიტუციაში ცვლილებების შეტანის შესახებ

სომხეთის რესპუბლიკის პრემიერ-მინისტრმა ნიკოლ ფაშინიანმა განაცხადა, რომ ერევანსა და ბაქოს შორის არსებული ყველა სადავო საკითხი, მათ შორის ის, რაც აზერბაიჯანის მიერ სომხეთის კონსტიტუციასთან დაკავშირებით იწევა, შეიძლება საბოლოოდ მოგვარდეს მხარეთა მიერ უკვე წინასწარ ხელმოწერილი მშვიდობის შეთანხმების ხელმოწერითა და რატიფიკაციით.

„არმენპრესის“ ინფორმაციით, ფაშინიანმა ამის შესახებ აღნიშნა პარიზის მშვიდობის ფორუმის ფარგლებში გამართულ დისკუსიაზე სახელწოდებით  „ლიდერობის გზაჯვარედინებზე“, სადაც ის გამოეხმაურა აზერბაიჯანის მხრიდან სომხეთის კონსტიტუციაში ცვლილებების შეტანის მოთხოვნასა და ამასთან დაკავშირებულ შეშფოთებას.

„აზერბაიჯანი ამ საკითხს აყენებს, მაგრამ რეალობა ასეთია: 2024 წელს სომხეთის საკონსტიტუციო სასამართლომ მიიღო გადაწყვეტილება, რომელიც უმაღლესი სამართლებრივი დონის დოკუმენტია, რომ სომხეთის კონსტიტუცია არ შეიცავს არცერთ ტერიტორიალურ პრეტენზიას რომელიმე მეზობელი ქვეყნის მიმართ“, - აღნიშნა ფაშინიანმა.

პრემიერ-მინისტრმა ასევე ხაზი გაუსვა, რომ სომხეთსა და აზერბაიჯანს შორის მშვიდობის შეთანხმების ტექსტში მრავალი მუხლი არსებობს, სადაც ნათქვამია, რომ მხარეები არ წარმოადგენენ ტერიტორიალურ პრეტენზიებს ერთმანეთს და ვალდებულებას იღებენ, რომ მომავალშიც არ ექნებათ მსგავსი მოთხოვნები.

„მშვიდობის შეთანხმებაში, რომელიც უკვე წინასწარ ხელმოწერილია, ყველა საკითხი, რომელიც შეიძლება სადავოდ ჩაითვალოს, უკვე ასახულია. შესაბამისად, ასეთი პრობლემა არ არსებობს. თუნდაც არსებობდეს გარკვეული ეჭვები ან განცხადებები, შეთანხმება ყველა ამ თემას ეხება. ამ ყველაფრის საბოლოოდ დასასრულებლად და სამართლებრივად გასაფორმებლად საჭიროა შეთანხმების ხელმოწერა და რატიფიკაცია, ამის შემდეგ მას ექნება უმაღლესი იურიდიული ძალა და აღარ იარსებებს სხვა ინტერპრეტაციის შესაძლებლობა“, - აღნიშნა სომხეთის პრემიერ-მინისტრმა.

აზერბაიჯანი კვლავ განიხილავს სომხეთის კონსტიტუციის შეცვლას როგორც წინაპირობას მშვიდობის შეთანხმების საბოლოო ხელმოწერისთვის։ ბაქო მოითხოვს კონსტიტუციიდან ამოიღონ დამოუკიდებლობის დეკლარაციაზე მინიშნება, სადაც საუბარია სომხეთისა და მთიანი ყარაბაღის გაერთიანებაზე.

სომხეთის მხარემ არაერთხელ განაცხადა, რომ 2024 წლის 26 სექტემბერს სომხეთის საკონსტიტუციო სასამართლოს გადაწყვეტილებაში დაფიქსირდა, რომ კონსტიტუციის პრეამბულაში დამოუკიდებლობის დეკლარაციაზე მინიშნება ეხება მხოლოდ იმ დებულებებს, რომლებიც სიტყვასიტყვითაა გამეორებული კონსტიტუციის მუხლებში. შესაბამისად, სომხეთის კონსტიტუციის ტექსტში არც პირდაპირი და არც არაპირდაპირი მითითება მთიან ყარაბაღზე არ არსებობს.

შეგახსენებთ, რომ 8 აგვისტოს ვაშინგტონში სომხეთმა და აზერბაიჯანმა წინასწარ მოაწერეს ხელი მშვიდობის შეთანხმებას. სომხეთის რესპუბლიკის საგარეო საქმეთა მინისტრმა არარატ მირზოიანმა ცოტა ხნის წინ განაცხადა, რომ სომხეთი არ იღებს აზერბაიჯანის წინაპირობას სომხეთის კონსტიტუციის შეცვლის თაობაზე.