სომხეთსა და ნატოს შორის განიხილება თანამშრომლობის ახალი დოკუმენტის მიღების საკითხი

სომხეთ–ნატოს პარტნიორობა სომხეთის უსაფრთხოების ერთ-ერთი საკვანძო საყრდენია.

„არმენპრესის“ ინფორმაციით, ამის შესახებ ერევანში მიმდინარე ნატოს საპარლამენტო ასამბლეის 108-ე როუზ-როთის სემინარზე აღნიშნა სომხეთის რესპუბლიკის ეროვნული ასამბლეის დელეგაციის ხელმძღვანელმა, ანდრანიკ ქოჩარიანმა.

„ჩვენ ვერ დავხუჭავთ თვალს გლობალურ გეოპოლიტიკურ ცვლილებებზე, რომლებიც ახალ რეალობებს ქმნის ახალი გამოწვევებითა და კონკურენტული დღის წესრიგით. ამ კონტექსტში განსაკუთრებით მინდა ხაზი გავუსვა სომხეთ–ნატოს პარტნიორობის საკვანძო როლს“, – განაცხადა ქოჩარიანმა.

მისი თქმით, სომხეთისა და ნატოს ურთიერთობებს უკვე სამი ათწლეულის ისტორია აქვს․ თანამშრომლობა დაიწყო 1994 წელს „პარტნიორობა მშვიდობისათვის“ პროგრამის ფარგლებში, ხოლო 2006 წლიდან ხორციელდება ინდივიდუალური პარტნიორობის სამოქმედო გეგმებით.

„ამჟამად მიმდინარეობს განხილვები თანამშრომლობის ახალი დოკუმენტის, ინდივიდუალურად მორგებული პარტნიორობის პროგრამის დამტკიცების მიმართულებით“, – აღნიშნა მან.

ქოჩარიანის განცხადებით, სომხეთის ჩართულობა ნატოსთან თანამშრომლობაში მოიცავს თავდაცვისა და უსაფრთხოების სისტემების რეფორმებს, მართვის გამჭვირვალობის ამაღლებას, სამოქალაქო კონტროლის გაძლიერებას, ასევე საერთაშორისო სამშვიდობო მისიებში მონაწილეობას.

„ჩვენი თანამშრომლობა დაფუძნებულია საერთო ღირებულებებზე, დემოკრატიაზე, ადამიანის უფლებების დაცვასა და სამართლის უზენაესობაზე. ის არა მხოლოდ თავდაცვითი, არამედ სისტემური რეფორმების პლატფორმაა, რომელიც ხელს უწყობს სომხეთის დამოუკიდებლობის განმტკიცებას და ინსტიტუციურ მდგრადობას“, – აღნიშნა ქოჩარიანმა.

სომეხმა დეპუტატმა განსაკუთრებული ყურადღება გაამახვილა ჰიბრიდულ საფრთხეებზე, დეზინფორმაციასა და ინფორმაციულ გარემოში მანიპულაციებზე, მისი თქმით, ეს ყველაფერი მიმართულია საზოგადოებრივი განწყობების შესუსტებისა და სახელმწიფო პოლიტიკის ჩაშლისკენ.

„სომხეთი დეზინფორმაციული პროპაგანდის მიზანმიმართულ გამოყენებასთან არის დაპირისპირებული. ამ საფრთხეების წინააღმდეგ ბრძოლაში ჩვენთვის მნიშვნელოვანია საზოგადოებრივი ცნობიერებისა და ციფრული წიგნიერების ამაღლება, მედიისა და სამოქალაქო საზოგადოების ჩამოყალიბების ხელშეწყობა, ასევე ინფორმაციული უსაფრთხოების სფეროში საერთაშორისო გამოცდილების გაზიარება“, – აღნიშნა ქოჩარიანმა.

მისი თქმით, დემოკრატიული სტაბილურობის მნიშვნელოვანი წინაპირობაა ასევე თავდაცვისა და უსაფრთხოების სფეროში სამოქალაქო კონტროლი.

„ეს ზრდის საზოგადოებრივ ნდობას და უზრუნველყოფს ძალოვან სტრუქტურების კანონთან და დემოკრატიულ პრინციპებთან შესაბამის საქმიანობას“, – განაცხადა მან.

ქოჩარიანმა დაამატა, რომ თავდაცვის სფეროში გამჭვირვალობისა და ანგარიშვალდებულების პრობლემები ბუნებრივია, ეროვნული უსაფრთხოების თავისებურებებიდან გამომდინარე, თუმცა ეს არ უნდა გადაიზარდოს ანგარიშვალდებულების არარსებობაში.