ნიკოლ ფაშინიანი არ დაესწრება ევრაზიის ეკონომიკური კავშირის ქვეყნების ევრაზიული მთავრობათაშორისი საბჭოს სხდომას

სომხეთის პრემიერ-მინისტრი ნიკოლ ფაშინიანი არ დაესწრება 15 აგვისტოს ყირგიზეთში გამართულ ევრაზიის ეკონომიკური კავშირის ქვეყნების ევრაზიული მთავრობათაშორისი საბჭოს სხდომას.

„არმენპრესის“ ცნობით, ამის შესახებ 1Lurer.am-ს განუცხადა სომხეთის რესპუბლიკის პრემიერ-მინისტრის პრესმდივანმა ნაზელი ბაღდასარიანმა, რომელმაც აღნიშნა, რომ ნიკოლ ფაშინიანი 12-15 აგვისტოს შვებულებაშია.

სხდომაზე განიხილება კლიმატური დღის წესრიგის რეგულირების მიდგომები, ასევე 2024-2026 წლებში ევრაზიის ეკონომიკური კავშირის წევრ სახელმწიფოებში კოორდინირებული სატრანსპორტო პოლიტიკის განხორციელების ძირითადი მიმართულებები და ღონისძიებების პროგრამის განახლება, ასევე მედიკამენტების საერთო ბაზრების განვითარების კონცეფციის შეთანხმება.

ადრე სომხეთის რესპუბლიკის ვიცე-პრემიერ მჰერ გრიგორიანის ოფისმა განაცხადა, რომ ევრაზიული მთავრობათაშორისი საბჭოს სხდომაში სომხეთის მხრიდან მონაწილეობას მიიღებს ვიცე-პრემიერი მჰერ გრიგორიანი.