ნაზელი ბაღდასარიანმა უარყო მტკიცებები, თითქოს სომხეთი დათანხმდა ან დაეთანხმება „დერეფნის“ ტიპის გადაწყვეტილებებს

სომხეთის რესპუბლიკის პრემიერ-მინისტრის პრესმდივანმა ნაზელი ბაღდასარიანმა განაცხადა, რომ ყველა ის მტკიცება და პუბლიკაცია, თითქოს სომხეთი დათანხმდა, თანხმდება ან დაეთანხმება „დერეფნის“ ტიპის გადაწყვეტილებებს, არ შეესაბამება სინამდვილეს.

„არმენპრესის“ ცნობით, ამის შესახებ ნაზელი ბაღდასარიანმა „ფეისბუქის“ თავის გვერდზე დაწერა.

„ყველა ის მტკიცება და პუბლიკაცია, თითქოს სომხეთი დათანხმდა, თანხმდება ან დაეთანხმება „დერეფნის“ ტიპის გადაწყვეტილებებს, უბრალოდ არ შეესაბამება სინამდვილეს.

სომხეთის რესპუბლიკის მიდგომები ძალიან მკაფიოდაა წარმოდგენილი პრემიერ-მინისტრ ფაშინიანის მიერ მიმდინარე წლის 16 ივლისის პრესკონფერენციაზე, ყოველგვარი ორმაგი ინტერპრეტაციის შესაძლებლობის გარეშე.

სხვა რაიმე ლოგიკაზე საუბარი ვერ იქნება“, - დაწერა ბაღდასარიანმა.

ამამდე ვაშინგტონში მოღვაწე ჟურნალისტმა ალექს რაუфოღლუმ, რომელიც პირველმა გამოაცხადა სომხეთის პრემიერ-მინისტრ ნიკოლ ფაშინიანის, აშშ-ის პრეზიდენტ დონალდ ტრამპისა და აზერბაიჯანის პრეზიდენტ ილჰამ ალიევის შორის ვაშინგტონში დაგეგმილი სამმხრივი შეხვედრის შესახებ, X-ის თავის მიკრობლოგში დაწერა, რომ რეგიონული კომუნიკაციების გახსნის კონტექსტში „დერეფნის“ ლოგიკა ამოღებულია, ხოლო სამმხრივი შეხვედრის დროს მთავარი ყურადღება გამახვილდება ტრანზიტისა და განვითარების ახალ გეგმაზე, რომელსაც ეწოდება „ტრამპის მარშრუტი საერთაშორისო მშვიდობისა და კეთილდღეობისთვის“ (Trump Route for International Peace and Prosperity) და იქნება ცნობილი TRIPP-ის აბრევიატურით.

„დერეფანი აღარ არსებობს. სამიტის დროს მთავარი ყურადღება გამახვილდება „ტრამპის მარშრუტზე საერთაშორისო მშვიდობისა და კეთილდღეობისთვის“ ანუ TRIPP სახელწოდებით ტრანზიტისა და განვითარების ახალ პროგრამაზე“, – დაწერა რაუფოღლუმ და ხაზი გაუსვა, რომ აშშ-ის ოფიციალურმა პირებმა უთხრეს, რომ სომხეთის სუვერენიტეტი, ტერიტორიული მთლიანობა და იურისდიქცია შენარჩუნდება.