2 წუთი კითხვის
სომხეთის ეროვნული ასამბლეის „პატივი მაქვს“ ფრაქციის მდივანი ტიგრან აბრაჰამიანი შეშფოთებულად აფასებს აზერბაიჯანის მიერ მასშტაბური შეიარაღების შეძენას.
„არმენპრესის“ ინფორმაციით, ამის შესახებ აბრაჰამიანმა განაცხადა საპარლამენტო ბრიფინგის დროს.
„ძალიან შემაშფოთებლად მიმაჩნია ის ფაქტი, რომ 44-დღიანი ომის შემდეგ აზერბაიჯანი მასშტაბურ შეიარაღებას ყიდულობს. ეს განსაკუთრებით გამოიხატება ისრაელიდან, თურქეთიდან, პაკისტანიდან და ასევე გარკვეული ევროპული ქვეყნებიდან შესყიდვებში“, – აღნიშნა დეპუტატმა.
რაც შეეხება კითხვას რუსეთისგან აზერბაიჯანის მიერ შეიარაღების შეძენის შესახებ, აბრაჰამიანმა აღნიშნა, რომ არ აქვს ინფორმაცია რაიმე გარიგების ან მისი მოცულობის შესახებ.
„გასული ათწლეულებისგან განსხვავებით, როდესაც შესყიდვების მნიშვნელოვანი ნაწილი საჯაროვდებოდა სხვადასხვა საერთაშორისო სტრუქტურების ან თავად აზერბაიჯანის მიერ, ბოლო წლებში აზერბაიჯანი ამ ინფორმაციას საკმაოდ დახურულად ინახავს. მხოლოდ ვარაუდების ფარგლებში რჩება იმის გაგება, კონკრეტულად რომელი ქვეყნებიდან და რა ტიპის შეიარაღებას ყიდულობს“, – განაცხადა მან.
მისი თქმით, ეს ძალიან მნიშვნელოვანია სამხედრო-პოლიტიკური მდგომარეობის შეფასებისა და შესაბამის საფრთხეებზე სწორად რეაგირებისთვის.