სომხეთსა და აზერბაიჯანს შორის ახალი ესკალაცია და ახალი ომი არ იქნება: ფაშინიანი

სომხეთსა და აზერბაიჯანს შორის ახალი ესკალაცია და ახალი ომი არ იქნება, იქნება მშვიდობა. როგორც „არმენპრესი“ იუწყება, ამის შესახებ სომხეთის პრემიერ-მინისტრმა ნიკოლ ფაშინიანმა ეროვნული ასამბლეის ტრიბუნიდან განაცხადა.

„ჩვენი ნათქვამი არის ჩვენი ბედის მართვის უმთავრესი იარაღი. და ჩვენ ვამბობთ, რომ სომხეთსა და აზერბაიჯანს შორის ახალი ესკალაცია და ახალი ომი არ იქნება, იქნება მშვიდობა“, – განაცხადა ფაშინიანმა.

რაც შეეხება იმას, თუ როგორ მოხდება ეს პრემიერ-მინისტრმა ხაზი გაუსვა, რომ სომხეთმა და აზერბაიჯანმა აღიარეს ერთმანეთის ტერიტორიული მთლიანობა, სუვერენიტეტი, საერთაშორისოდ აღიარებული საზღვრების ხელშეუხებლობა, ძალის გამოყენებისა და ძალის გამოყენების მუქარის მიუღებლობა. მისი თქმით, ამას არა მხოლოდ პოლიტიკური, არამედ იურიდიული ძალაც აქვს, ვინაიდან საზღვრის დელიმიტაციის საკითხებზე მომუშავე კომისიების წესდება ორივე ქვეყანაში უმაღლესი იურიდიული ძალის მქონე დოკუმენტია.

„და ამ დოკუმენტში, ალმათის დეკლარაცია მიღებულია, როგორც დელიმიტაციის საფუძველი, შესაბამისად, როგორც სომხეთმა, ისე აზერბაიჯანმა ალმათის დეკლარაცია საერთო ჯამში ურთიერთობების დარეგულირების საბაზისო პრინციპად აქციეს. ამ დეკლარაციაში კი საბჭოთა რესპუბლიკების საზღვრების ხელშეუხებლობა, ერთმანეთის ტერიტორიული მთლიანობის აღიარება, შიდა საქმეებში ჩაურევლობა და ძალის გამოყენების მიუღებლობა საბაზისო პრინციპებია“, – აღნიშნა ფაშინიანმა.

მან სომხეთსა და აზერბაიჯანში მოქმედ ყველა ძალას მოუწოდა იყვნენ უკიდურესად პასუხისმგებლიანნი, არ გააკეთონ განცხადებები, რომლებიც პირდაპირ ან ირიბად ეწინააღმდეგება აღნიშნულ ლოგიკას და არ დააყენონ ეჭვქვეშ ეს მიდგომა.

„და ოფიციალურად ვაცხადებ, რომ სომხეთის რესპუბლიკის მთავრობა არ გააკეთებს არც განცხადებებს და არც ქმედებებს, რომლებიც პირდაპირ ან ირიბად ეწინააღმდეგება ამ ლოგიკას ან აყენებს ეჭვქვეშ ამ ლოგიკას. და მოვუწოდებ აზერბაიჯანის მთავრობას არ გააკეთოს არც განცხადებები და არც ქმედებები, რომლებიც ეწინააღმდეგება ან ეჭვქვეშ აყენებს ამ ლოგიკას“, – განაცხადა პრემიერ-მინისტრმა.

მან შეახსენა, რომ სომხეთმა და აზერბაიჯანმა შეათანხმეს სამშვიდობო და სახელმწიფოებს შორის ურთიერთობების დამყარების შესახებ შეთანხმების პროექტი, პროექტზე მოლაპარაკებები დასრულებულია. მისი თქმით, ამ ეტაპზე შეთანხმების ხელმოწერისთვის არ არსებობს არანაირი დაბრკოლება.

„შეთანხმების ტექსტი შეთანხმებულია, დაივიწყეთ სომხეთსა და აზერბაიჯანს შორის ესკალაცია და ომი. უნდა გავხსნათ სამხრეთ კავკასიის ისტორიის ახალი ფურცელი ერთად. და ჩვენ მზად ვართ ერთდროულად მოვაწეროთ ხელი როგორც სამშვიდობო შეთანხმებას, ასევე ეუთოს მიმართ სომხეთ–აზერბაიჯანის ერთობლივ მიმართვას მინსკის ჯგუფის სტრუქტურების დაშლის შესახებ“, – დაადასტურა ფაშინიანმა.