ამ ეტაპზე სომხეთი აზერბაიჯანს სარკინიგზო კავშირის გახსნას სთავაზობს։ ფაშინიანი

სომხეთის რესპუბლიკის პრემიერ-მინისტრმა ნიკოლ ფაშინიანმა განაცხადა, რომ სამხრეთ კავკასიაში რეგიონული კომუნიკაციების განბლოკვის კონტექსტში აზერბაიჯანს რკინიგზის გახსნას სთავაზობს.

„არმენპრესის“ ინფორმაციით, ამის შესახებ ფაშინიანმა ეროვნულ ასამბლეაში ჟურნალისტებთან გამართულ ბრიფინგზე განაცხადა.

პრემიერ-მინისტრმა გაიხსენა, რომ სომხეთმა თავისი მიდგომები პროექტში „მშვიდობის გზაჯვარედინი“ ჯერ კიდევ დიდი ხნის წინ წარმადგინა.

„და ამ პროექტის ფარგლებში დავიწყეთ მუშაობა და გავაგრძელებთ კიდეც“, – განაცხადა ფაშინიანმა.

ჟურნალისტის კითხვაზე, მიიღო თუ არა სომხეთმა აზერბაიჯანისგან პასუხი ამ წინადადებაზე, ფაშინიანმა უპასუხა: „ფაქტობრივად, წერილობით წინადადებაზე წერილობითი პასუხი არ მიგვიღია, თუმცა არსებობს სხვა კომენტარები“.

მან დაამატა, რომ ნებისმიერი პროექტის განხორციელებისას ჩნდება სენსიტიური საკითხები და მათ გარშემო საჭიროა მუშაობა.

„„მშვიდობის გზაჯვარედინი“ პროექტის ფარგლებში ჩვენ დავაფიქსირეთ, რომ მზად ვართ პროცედურების გამარტივებისთვის, იმ ოთხი ძირითადი პრინციპის დაცვის ფარგლებში: ტერიტორიული მთლიანობა, სუვერენიტეტი, იურისდიქცია და ურთიერთპატივისცემა. ახლა ამ ეტაპზე ჩვენ ვთავაზობთ, რომ გაიხსნას რკინიგზა, კონკრეტულად ჰორადიზი–იერასღის ხაზზე, რათა განხორციელდეს ტვირთბრუნვა აზერბაიჯანიდან აზერბაიჯანში სომხეთის ტერიტორიით და სომხეთიდან სომხეთში – აზერბაიჯანის ტერიტორიით“, – განაცხადა პრემიერ-მინისტრმა.

ფაშინიანმა კიდევ ერთხელ დაადასტურა, რომ სომხეთი მზად არის ამ გადაწყვეტილებებზე გადასასვლელად.

„ასევე მნიშვნელოვანია აღინიშნოს, რომ როდესაც ვამბობთ მზად ვართ ამ გადაწყვეტილებებისთვის, ვუსვამთ თავს კითხვას: ჩვენი საზოგადოება როგორ აღიქვამს იმ გადაწყვეტილებებს, რასაც ჩვენ ვთავაზობთ? თუ ჩვენ ეს თავდაჯერებულად ვამბობთ, ეს ნიშნავს, რომ გვაქვს გარკვეული რწმენა, რომ ჩვენი მოსახლეობა დაინახავს და იტყვის, რომ ეს ნორმალური კომპრომისია და შეიძლება იყოს ურთიერთად მისაღები. აი, ასეთია ლოგიკა“, – აღნიშნა ფაშინიანმა.

მან ასევე თქვა, რომ აზერბაიჯანი აცხადებს, თითქოს სომხეთი არ სთავაზობს გადაწყვეტილებებს და ამიტომ გადაწყვიტეს ირანის მარშრუტით სარგებლობა. „ეს ნიშნავს, რომ ირანის მარშრუტი და პირობები მათთვის მისაღებია. იმისთვის, რომ ამ კონტექსტში ყველაფერი ნათელი იყოს, ჩვენ ვაცხადებთ, რომ მზად ვართ უზრუნველვყოთ იმავე პირობებით სარგებლობა, როგორითაც აზერბაიჯანი გადის ირანის ისლამური რესპუბლიკის ტერიტორიაზე. ამით ვაჩვენებთ, რომ წარმოდგენა, თითქოს ჩვენს მიერ შეთავაზებული პირობები აზერბაიჯანისთვის მიუღებელი იყოს, არ შეესაბამება რეალობას. თუ იგივე პირობები მისაღებია ირანის ტერიტორიაზე გასვლისთვის, რატომ არ უნდა იყოს მისაღები სომხეთის ტერიტორიაზე გასვლისთვის?“, – განაცხადა პრემიერ-მინისტრმა.