რუსეთი მზად არის დაეხმაროს სომხეთსა და აზერბაიჯანს უთანხმოების დაძლევაში

რუსეთის საგარეო საქმეთა სამინისტროს ოფიციალურმა წარმომადგენელმა მარია ზახაროვამ განაცხადა, რომ მოსკოვი თვალს ადევნებს სომხეთ-აზერბაიჯანის საზღვარზე შექმნილ ვითარებას და მოუწოდებს მხარეებს თავშეკავებისკენ და პრობლემების მშვიდობიანი გზით გადაჭრისკენ․

„არმენპრესის“ კორესპონდენტის ინფორმაციით მოსკოვიდან, ამის შესახებ ზახაროვამ განაცხადა ყოველკვირეულ პრესკონფერენციაზე და ხაზი გაუსვა, რომ ბაქოსა და ერევანს კვლავ მიმართავს მოწოდებით, გამოიჩინონ თავშეკავება, გადადგან ნაბიჯები დეესკალაციის მიმართულებით და თავი შეიკავონ ნებისმიერი ქმედებისგან, რაც შესაძლოა გამოიწვიოს ვითარების გამწვავება.

„ყველა არსებული პრობლემა უნდა გადაწყდეს მხოლოდ მშვიდობიანი, პოლიტიკური გზით. ჩვენ, ჩვენი მხრივ, მზად ვართ მივიღოთ მონაწილეობა და ძალისხმევა მოვახმაროთ პარტნიორებს, რათა დავეხმაროთ მათ დაძლიონ უთანხმოებები და მიაღწიონ სამშვიდობო შეთანხმების ხელმოწერას. ასევე ვიმუშავებთ სატრანსპორტო და ეკონომიკური კომუნიკაციების განბლოკვის, საზღვრების დელიმიტაციისა და ჰუმანიტარული საკითხების გადაწყვეტის მიმართულებით, რაც ეფუძნება რუსეთის, აზერბაიჯანისა და სომხეთის ლიდერებს შორის მიღწეულ სამმხრივ შეთანხმებებს“, – აღნიშნა მარია ზახაროვამ.

აზერბაიჯანი ბოლო პერიოდში რეგულარულად ავრცელებს ცრუ ცნობებს იმის შესახებ, თითქოს სომხეთის შეიარაღებული ძალები სხვადასხვა მიმართულებით ცეცხლს ხსნიან აზერბაიჯანული პოზიციების მიმართულებით. სომხეთის თავდაცვის სამინისტრომ უარყო ბაქოს ყველა ბრალდება. აზერბაიჯანმა ასეთი საქციელი მას შემდეგ აირჩია, რაც მხარეებმა განაცხადეს, რომ მიაღწიეს შეთანხმებას სამშვიდობო შეთანხმების ტექსტის ირგვლივ. სომხეთმა ამის შემდეგ დაუყოვნებლივ შესთავაზა აზერბაიჯანს გაემართათ მოლაპარაკებები შეთანხმების ხელმოწერის ადგილისა და დროის შესახებ, თუმცა აზერბაიჯანი ახლა ახალი წინაპირობებით გამოდის შეთანხმების ხელმოწერისთვის.