საფრანგეთმა იმედი გამოთქვა, რომ სომხეთი და აზერბაიჯანი სამშვიდობო ხელშეკრულებას რაც შეიძლება მალე გააფორმებენ
1 წუთი კითხვის
საფრანგეთი მიესალმება სომხეთსა და აზერბაიჯანს შორის სამშვიდობო ხელშეკრულების მოლაპარაკებების წარმატებით დასრულებას.
„არმენპრესის“ ინფორმაციით, ამის შესახებ განცხადება საფრანგეთის საგარეო საქმეთა სამინისტრომ გაავრცელა.
„საფრანგეთი მიესალმება სომხეთსა და აზერბაიჯანს შორის სამშვიდობო ხელშეკრულების მოლაპარაკებების წარმატებით დასრულების შესახებ გაკეთებულ განცხადებას. საფრანგეთს იმედი აქვს, რომ შეთანხმება რაც შეიძლება მალე გაფორმდება.
სომხეთსა და აზერბაიჯანს შორის ურთიერთობების დარეგულირება, ორი ქვეყნის ტერიტორიული მთლიანობისა და სუვერენიტეტის პატივისცემის საფუძველზე, სამხრეთ კავკასიას მშვიდობის, ინტეგრაციისა და თანამშრომლობის ზონად გადააქცევს, ღია საზღვრებით და რეგიონის ხალხების სასარგებლოდ“, – აღნიშნულია განცხადებაში.
სომხეთსა და აზერბაიჯანს შორის მოლაპარაკებების წარმატებით დასრულებას ასევე მიესალმა საფრანგეთის პრეზიდენტი ემანუელ მაკრონი.
სომხეთმა და აზერბაიჯანმა 13 მარტს განაცხადეს, რომ საბოლოო შეთანხმებას მიაღწიეს სამშვიდობო ხელშეკრულების ტექსტზე. სომხეთის საგარეო საქმეთა სამინისტრომ განაცხადა, რომ მზად არის ბაქოსთან დაიწყოს მოლაპარაკებები ხელშეკრულების ხელმოწერის თარიღისა და ადგილის შესახებ.