აზერბაიჯანთან მოლაპარაკებებში ერევნისთვის მისაღებია ყველა ის პლატფორმა, რომელიც პატივს სცემს სომხეთის რესპუბლიკის ინტერესებს

სომხეთსა და აზერბაიჯანს შორის მოლაპარაკებებისთვის ერევნისთვის მისაღებია ყველა ის პლატფორმა, სადაც პატივს სცემენ სომხეთის რესპუბლიკის ინტერესებიდან გამომდინარე პრინციპებს.

„არმენპრესის“ ინფორმაციით, ამის შესახებ ჟურნალისტებთან ბრიფინგზე განაცხადა სომხეთის პარლამენტის „სამოქალაქო ხელშეკრულების“ ფრაქციის მდივანმა არტურ ჰოვჰანისიანმა სომხეთსა და აზერბაიჯანს შორის ურთიერთობების ნორმალიზაციის პლატფორმებსა და 2020 წლის 9 ნოემბრის სომხეთის, რუსეთისა და აზერბაიჯანის სამმხრივ განცხადებაზე საუბრისას.

მისი თქმით, იმ მოლაპარაკების პლატფორმები, სადაც პატივს სცემენ სომხეთის რესპუბლიკის და ზოგადად, სახელმწიფოების სუვერენიტეტის ინტერესებიდან გამომდინარე პრინციპებს, მისაღებია ერევნისთვის.

„სომხეთის საგარეო საქმეთა მინისტრ არარატ მირზოიანის მოსკოვში ვიზიტიც ამაზე მიანიშნებს. რაც შეეხება 9 ნოემბრის განცხადების მე-9 პუნქტს და „მშვიდობის გზაჯვარედინის“ პროექტში ჩვენს მიერ წარმოდგენილ წინადადებებს, ვფიქრობ, ისინი ერთმანეთისგან დიდად არ განსხვავდება, რადგან 9 ნოემბრის განცხადებაში არ არის ნახსენები ექსტერიტორიალური ზონების საკითხი, ისე როგორც „მშვიდობის გზაჯვარედინის“ პროექტში. ჩვენ ვსაუბრობთ გზების განბლოკვისა და ინფრასტრუქტურის აღდგენის საკითხებზე, თითოეული სახელმწიფოს სუვერენიტეტის ფარგლებში“, – აღნიშნა ჰოვჰანისიანმა.

მისი თქმით, სომხეთ-აზერბაიჯანის მოლაპარაკებები მრავალმხრივ პლატფორმებზე მიმდინარეობს, ხოლო ერევანი იყენებს ყველა შესაძლებლობას, რათა მშვიდობის დღის წესრიგი წინ წასწიოს.

„კონკრეტულ პლატფორმაზე არ ვჩერდებით, რადგან გვჯერა, რომ ერთ პლატფორმაზე მიმდინარე დისკუსიები აქამდე იმდენად ეფექტიანი არ ყოფილა“, – განაცხადა არტურ ჰოვჰანისიანმა.