სომხეთმა და აზერბაიჯანმა ერთმანეთს შეატყობინეს დელიმიტაციის კომისიების რეგლამენტის ძალაში შესვლის შესახებ

ერევანი, 1 ნოემბერი, არმენპრესი. 1 ნოემბერს სომხეთის რესპუბლიკისა და აზერბაიჯანის რესპუბლიკის საზღვარზე გაიმართა სომხეთისა და აზერბაიჯანის სახელმწიფო საზღვრის დელიმიტაციისა და საზღვრის უსაფრთხოების საკითხების კომისიისა და აზერბაიჯანის რესპუბლიკისა და სომხეთის რესპუბლიკის სახელმწიფო საზღვრის დელიმიტაციის სახელმწიფო კომისიის მეათე შეხვედრა, რომელსაც სომხეთის რესპუბლიკის ვიცე-პრემიერი მჰერ გრიგორიანი და აზერბაიჯანის რესპუბლიკის ვიცე-პრემიერი შაჰინ მუსტაფაევი უძღვებოდნენ. „არმენპრესის“ ცნობით, ამის შესახებ განცხადება გაავრცელა სომხეთის საგარეო საქმეთა სამინისტრომ.

აღინიშნება, რომ შეხვედრის დროს, ზემოთხსენებული კომისიების ერთობლივი საქმიანობის შესახებ 2024 წლის 30 აგვისტოს ხელმოწერილი რეგლამენტის მე-7 მუხლის შესაბამისად, მხარეებმა გაცვალეს შეტყობინებები მათ სახელმწიფოებში რეგლამენტის ძალაში შესვლისთვის საჭირო შიდა პროცედურების დასრულების შესახებ.

„რეგლამენტის მე-7 მუხლის გათვალისწინებით, რომელიც ითვალისწინებს, რომ რეგლამენტი ძალაში შედის ამ პროცედურების დასრულების შესახებ უკანასკნელი წერილობითი შეტყობინების მიღების დღეს, მხარეებმა დააფიქსირეს, რომ აღნიშნული რეგლამენტი 2024 წლის 1 ნოემბერს შედის ძალაში.

მხარეებმა აზრი გაცვალეს დელიმიტაციის სამუშაოების შემდგომი განხორციელებისათვის საზღვრის მონაკვეთების/სეგმენტების თანმიმდევრობის საკითხის შესახებ.

მხარეებმა განიხილეს დელიმიტაციის სამუშაოების განხორციელების წესის შესახებ შესაბამისი სახელმძღვანელოების პროექტები.

მხარეები შეთანხმდნენ სამუშაო რეჟიმში შეათანხმონ შემდეგი შეხვედრის თარიღი და ადგილს“, - ნათქვამია განცხადებაში.

წყაროს ცნობით, კომისიების შეხვედრის დასრულების შემდეგ, სომხეთის რესპუბლიკის ვიცე-პრემიერ მჰერ გრიგორიანსა და აზერბაიჯანის რესპუბლიკის ვიცე-პრემიერ შაჰინ მუსტაფაევს ცალკე განუხილავთ სატრანსპორტო კომუნიკაციებთან დაკავშირებული საკითხები.