საქართველოს პარლამენტის თავმჯდომარე მიესალმა ევროკომისიის რეკომენდაციას საქართველოსათვის ევროკავშირის კანდიდატის სტატუსი

ერევანი, 9 ნოემბერი, არმენპრესი. ვროკავშირმა აღიარა საქართველოს მომავალი სრულფასოვანი წევრობა ევროპულ ოჯახში და კიდევ ერთხელ დაადასტურა ქვეყნის ევროპული მისწრაფებისა და არჩევნის მხარდაჭერა. როგორც „არმენპრესი“ Sputnik-ის ქართული სამსახურიდან იუწყება, ამის შესახებ საქართველოს პარლამენტის თავმჯდომარემ შალვა პაპუაშვილმა განაცხადა.

ევროკომისიამ 8 ნოემბერს გამოაქვეყნა ანგარიში საქართველოს მიერ ევროკავშირის კანდიდატის სტატუსის მოსაპოვებლად აუცილებელი 12 რეკომენდაციის შესრულების შესახებ - ევროკომისიამ ევროპულ საბჭოს საქართველოსთვის კანდიდატის სტატუსის მინიჭების რეკომენდაციით მიმართა.

პაპუაშვილის თქმით, ეს პირველი ნაბიჯია სტრატეგიული გადაწყვეტილებისკენ, რომელიც ევროკავშირმა უნდა მიიღოს. როგორც პარლამენტის თავმჯდომარემ აღნიშნა, დღევანდელი დღე მყარ ნიადაგს ქმნის საქართველოს უკეთესი მომავლისთვის.

როგორც მან აღნიშნა, რეკომენდაცია სტატუსის მინიჭების შესახებ ერთ მნიშვნელოვან ეტაპს ასრულებს. ამავე დროს, იწყება ევროკავშირის წევრობისკენ გრძელი გზა, სადაც თითოეული მოქალაქის ცოდნა, პროფესიონალიზმი და პატრიოტიზმი წარმატების აუცილებელი წინაპირობაა.

უკვე 14-15 დეკემბერს ევროპული საბჭო ევროკომისიის დასკვნის საფუძველზე მიიღებს შემაჯამებელ გადაწყვეტილებას გაფართოების პოლიტიკისა და საქართველოსთვის კანდიდატის სტატუსის მინიჭების თაობაზე.

2022 წლის ივნისში ევროპულმა საბჭომ მიიღო გადაწყვეტილება, აღიაროს საქართველოს ევროპული პერსპექტივა და გამოთქვა მზადყოფნა, მიანიჭოს მას კანდიდატი ქვეყნის სტატუსი, როგორც კი შესრულდება 12 პირობა.