Արտասահմանյան ջինսերին փոխարինելու կգա հայկականը. Գյումրիում մեկնարկել է «Made in Armenia» ջինսերի արտադրությունը
2 րոպեի ընթերցում
ԵՐԵՎԱՆ, 18 ՄԱՐՏԻ, ԱՐՄԵՆՊՐԵՍ: Չինական ու թուրքական ջինսերին փոխարինելու կգա հայկականը: «Made in Armenia» ջինսերը վաճառքում կլինեն մեկ ամսից: Ջինսերն արտադրվում են Գյումրիում: Զաքարյան ընտանիքը 2 միլիոն դոլարի ներդրում է կատարել՝ արտադրությունը սկսելու համար:
«Արմենպրես»-ի հաղորդմամբ՝ Կառավարության ֆեյսբուքյան էջում նոր արտադրության մասին տեսանյութ է հրապարակվել:
«Ռ. Զաքարյան» ընկերությունը որակյալ արտադրանք ստանալու համար անհրաժեշտ սարքավորումները ներկրել է արտասահմանից: Դրա համար ստացել է կառավարության աջակցությունը. 3 տարով կրճատվել է ընկերության ապրանքների ներմուծման դեպքում մաքսային եւ հարկային մարմինների կողմից հաշվարկված ավելացված արժեքի հարկի գումարների վճարման ժամկետը: «Դա հնարավորություն տվեց խնայել և այդ միջոցները սարքավորումներ գնելու մեջ ներդնել»,-նշում է ընկերության կոմերցիոն տնօրեն Լիլիթ Զաքարյանը:
Անհրաժեշտ կադրերի պատրաստման հարցում օգնության են եկել դրսից հրավիրված իտալացի փորձառու վարպետները:
Տեխնոլոգ Մաուրո դի Ջուզեպպեն Հայաստան է եկել օգնելու բարձր որակի արտադրանք ստանալու հարցում: «Դեռ որոշակի ճանապարհ ունենք անցնելու , բայց ես մեծ ցանկություն և կամք ունեմ իմ ողջ փորձառությունը փոխանցելու համար»,-նշում է նա:
Նոր արտադրամասում աշխատանքը հիմնականում ավտոմատացված է: Արտադրությունում ավելի քան 50 մարդ է աշխատում: Նախատեսում են առաջիկա երկու տարում աշխատակիցների թիվը հասցնել 100-ի, արտադրությունն ավելացնել 4 անգամ:
«Մեր արտադրության մոտավորապես 5 տոկոսը նախատեսում ենք սպառել Հայաստանի տարածքում: Մեր հինական թիրախը արտահանումն է: Արդեն պայմանագիր ունենք Ռուսաստանի հետ, մոտակա ժամանակներս կունենանք պայմանագրեր Իտալիայի և եվրոպական այլ երկրների ընկերությունների հետ»,- ասում է ընկերության կոմերցիոն տնօրենը՝ հավելելով, որ, բացի ջինսե տաբատներ և բաճկոններ արտադրելուց, նպատակ կա կարել նաև վերնաշապիկներ և այլ տրիկոտաժեղեն: