Հայրենադարձ Կարեն Պապյանը նախատեսում է իր գործը հիմնել տեղեկատվական տեխնոլոգիաների ոլորտում

ԵՐԵՎԱՆ, 7 ՆՈՅԵՄԲԵՐԻ, ԱՐՄԵՆՊՐԵՍ: Ռուսաստանում 25 տարի ապրելուց հետո Պապյանների ընտանիքը որոշել է տեղափոխվել Հայաստան: Ինչպես տարբեր երկրներում գտնվող հայ բազմաթիվ ընտանիքներում ժամանակ առ ժամանակ քննարկվում է Հայրենիք վերադառնալու հարցը, այնպես էլ Պապյաններին հանգիստ չէր տալիս Հայաստանում բնակություն հաստատելու միտքը: Ընտանիքի հայրը՝ Կարեն Պապյանը «Արմենպրես»-ի հետ զրույցում նշեց, որ Հայաստան տեղափոխվելու որոշման հարցում վճռական եղավ երեխաների ցանկությունը:

«Հայաստանից Ռուսաստան ենք տեղափոխվել 1993 թվականի սեպտեմբերի 21-ին: Արդեն 25 տարի է ապրում ենք Պերմում: Ունենք 5 երեխա: Նրանք ծնվել, մեծացել են Ռուսաստանում: Այս տարիների ընթացքում պարբերաբար հնարավորություն եմ ստեղծել, որ երեխաներս գան Հայաստան, հայրենիքի հետ կապը միշտ պահեն, սակայն Հայաստան տեղափոխվելու մասին դեռ խոսք չկար: Թեպետ վերջերս ժամանակ առ ժամանակ քննարկում էինք այդ հարցը, սակայն մտավախություն ունեինք երեխաների հետ կապված, մտածում էինք միգուցե չկարողանան հարմարվել: Ժամանակը ցույց տվեց, որ հենց նրանց ցանկությամբ մենք վերջնական տեղափոխվեցինք»,-ասաց Կարեն Պապյանը:

Երեխաները նախորդ տարի ՀՀ սփյուռքի նախարարության «Արի տուն» ծրագրով Հայաստանում են եղել: Շատ տպավորված են վերադարձել Պերմ, և հենց այդ ժամանակվանից ընտանիքում սկսեցին լրջորեն քայլեր ձեռնարկել Հայաստան տեղափոխվելու ուղղությամբ:

«Ապրելով Ռուսաստանում՝ ես միշտ երազել եմ, որ երեխաներս ամուր կապի մեջ լինեն հայրենիքի հետ, բայց արի ու տես, որ այսօր ավելին եղավ. Հայաստանը, հայկական իրականությունը, հայրենի հողը դարձան երեխաներիս առօրյան: Մենք այստեղ ենք օգոստոսից, երեխաներս տեղավորվել են ուսումնական հաստատություններում: Շատ-շատ գոհ են, որ Հայաստանում են, մենք էլ ոգեշնչվում ենք այդ ամենով»,-ավելացրեց Կարեն Պապյանը:

Պերմում ապրելու տարիներին Կարեն Պապյանը եղել է և ներկայում էլ հանդիսանում է հայ համայնքի ակտիվ գործիչներից: Նա Պերմի հայ առաքելական եկեղեցու ատենապետն է: Կարեն Պապյանն ասում է, որ այնտեղ դեռ անելիքներ ունի, հետևաբար մի որոշ ժամանակ այցելություններ Պերմ կլինեն:

«Ռուսաստանում ապրել ենք 25 տարի, սակայն այսօր որոշեցինք վերաբնակվել Հայաստանում: Ես դա պատահական չեմ համարում: Գիտեք, երբ ամբողջ կանքում կապված ես Հայրենիքի հետ, այն քո ներսում է, քո սրտում, սիրում ես քո երկիրը, ուրեմն սպասելի է նաև մեր արածի նման քայլը»,-հավելեց նա:

Քանի որ Կարեն Պապյանը, մինչ Հայաստան տեղափոխվելը, հաճախ է այցելել Երևան, հետևաբար լավ ուսումնասիրել է գործունեություն ծավալելու տեղի հնարավորությունները և, ինչպես ինքն է ասում, շատ հստակ գիտի, թե ինչով է զբաղվելու: Իր սեփական գործն է ցանկանում հիմնել տեղեկատվական տեխնոլոգիաների ոլորտում: Ներկայում իր աշխատանքային թիմն է հավաքում:

Աննա Գզիրյան