3 րոպեի ընթերցում
ԵՐԵՎԱՆ, 18 ՍԵՊՏԵՄԲԵՐԻ, ԱՐՄԵՆՊՐԵՍ: «Լույս» դաշինքի Երևանի քաղաքապետի թեկնածու Արտակ Զեյնալյանը առաջնային խնդիրներից մեկն է համարում քաղաքի աղբահանության հարցը:
Ինչպես տեղեկացնում է «Արմենպրես»-ը լրագրողների հետ զրույցում Զեյնալյանը նշեց, որ Երևանի գրեթե բոլոր բակերում գարշահոտություն է տարածվել, և այդ հարցին պետք շուտափույթ լուծում տրվի:
«Մտնում ես բակ, գարշահոտություն է տարածված բակում, և դա՝ ամենուրեք, այդ աստիճան սուր է այսօր աղբահանության հարցը Երևանում։ Եվ դա անմիջականորեն հարվածում է զբոսաշրջությանը, ինչը նաև մեր եկամուտի աղբյուրներից է»,- ասաց նա:
Ըստ քաղաքապետի թեկնածուի` աղբահանության հարցը բազմաշերտ խնդիր է, և դա միայն օպերատորի վրա թողնելը սխալ համարում:
«Դա պայմանավորված է նաև աղբավայրի, աղբավայր տանող ավտոճանապարհի որակով։ Թափոնները երկրորդային հումք են, իսկ մեզ մոտ դրանք քիչ են օգտագործվում՝ որպես երկրորդային հումք։ Երկրներ կան, որտեղ ուղղակի 5 աղբաման է դրված, մարդիկ տեսակավորում են աղբը, դա դառնում է եկամտի աղբյուր, նպաստում շրջակա միջավայրի պաշտպանությանը»,- նշեց Զեյնալյանը:
Նրա խոսքով` աղբը նաև կարող է հանդիսանալ էներգիայի աղբյուր է, և կարելի է նաև որպես էներգիա օգտագործել. «Սա համակարգային առումով լուծելու ենք։ Ունենք գաղափար՝ օգտագործել նաև ջերմային թափոնները»,- հավելեց Զեյնալյանը:
Խոսելով ընտրական քարոզարշավի ընթացքից՝ Զեյնալյանը նշեց, որ իրենք իրականացնում են պոզիտիվ քարոզարշավ, և իրենց դաշինքի համար շատ կարևոր է հենց այդ մթնոլորտում քաղաքապետ դառնալը:
«Դա կառավարման բովանդակության հետ անմիջականորեն կապված ձև է։ Մեզ համար գերխնդիր չէ ուղղակի զբաղեցնել այդ պաշտոնները»,- ասաց «Լույս» դաշինքի քաղաքապետի թեկնածուն:
Զեյնալյանը, ով նաև զբաղեցնում է Արդարադատության նախարարի պաշտոնը, գտնում է, որ իրենք պետք է ձևավորեն մի համայնք, որտեղ մերժվածներ չկան և խտրականություն չկա:
«Խտրականության դրսևորման ձևերից է նաև թիրախավորումը, հալածանքը, ինչն ուզում ենք բացառել, այլապես կլինի սովորական կառավարում, և մեզ անհրաժեշտ կլինի 20-30 տարի, որ կարողանանք այդ բացը լրացնել»,- եզրափակեց Զեյնալյանը: