2 րոպեի ընթերցում
ԵՐԵՎԱՆ, 5 ԱՊՐԻԼԻ, ԱՐՄԵՆՊՐԵՍ: Լիբանանի Քասլիքի Սուրբ Հոգի համալսարանում մի խումբ հայ երիտասարդներ ապրիլի 4-ին տապալել են Հայոց ցեղասպանության հարցում ժխտողական դիրքորոշմամբ հայտնի թուրք պատմաբան Իլբեր Օրթայլըի դասախոսություն-քննարկումը: Ինչպես հաղորդում է «Արմենպրես»-ը, ՀՅԴ Զավարյան ուսանողական միության անդամները խաղաղ ակցիայի միջոցով դատապարտել են Հայոց ցեղասպանության հարցում Թուրքիայի ժխտողական քաղաքականությունը:
Թուրքիայի կառավարությանն առընթեր Յունուս Էմրե ինստիտուտի հետ համագործակցության արդյունքում կազմակերպված միջոցառմանը սրահում գտնվող հայ երիտասարդները ոտքի են կանգնել և սկսել են վանկարկել. «Ցեղասպանությունը ժխտող», «Թուրքիան մեղավոր է ցեղասպանության համար», «Ամոթ Թուրքիային», «Մենք այստեղ ենք»:
Երիտասարդները կրել են սպիտակ շապիկներ, որոնց վրա տարբեր գրություններ են եղել, ինչպես օրինակ` «Ապրիլի 24», «Արևելյան Թուրքիան Արևմտյան Հայաստանն է», «Հրանտ Դինք», «Սևակ Բալըքչը»:
Նրանք հորդորել են պատմաբանին խոսել ճշմարտության մասին, այնուհետև դուրս են եկել լսարանից: Սակավամարդ մնացած լսարանում Հայոց ցեղասպանության մասին հնչեցված հարցին պատմաբանը խուսափողական պատասխան է տվել:
