Մոսկվայի Ցեղասպանագիտական գիտաժողովը կընձեռի ռուսական գիտական շրջանակների ուշադրությունը գրավելու հնարավորություն

ԵՐԵՎԱՆ, 22 ՀՈԿՏԵՄԲԵՐԻ, ԱՐՄԵՆՊՐԵՍ: Մոսկվայի հայկական վանական համալիրում հոկտեմբերի 23-ին մեկնարկող Ցեղասպանագիտական միջազգային գիտաժողովը կընձեռի ռուսական գիտական շրջանակների ուշադրությունը գրավելու հնարավորություն:«Արմենպրես»-ի հետ զրույցում այս մասին նշեց Հայոց ցեղասպանության թանգարան-ինստիտուտի փոխտնօրեն Սուրեն Մանուկյանը:

«Հոկտեմբերի 23-24-ը Մոսկվայում կայանալիք գիտաժողովը և դրա իրականացման վայրը ավելի խորհրդանշական են՝ հաշվի առնելով գիտաժողովի խորագիրը՝ «Ցեղասպանությունն իբրև մարդկության դեմ ուղղված հոգևոր-բարոյական հանցագործություն»: Գիտաժողովը շատ կարևոր տեղ է գրավում 2015թ. տեղի ունեցած միջազգային գիտական միջոցառումների շարքում մի քանի պատճառով: Նախ, այն տեղի է ունենում Մոսկվայում, ինչը հնարավորություն է տալիս գրավել ռուսական գիտական շրջանակների ուշադրությունը: Ռուսաստանում, ցավոք, ցեղասպանագիտությունը, որպես գիտական ոլորտ, դեռևս այդքան էլ զարգացած չի, և մենք հույս ունենք, որ այս գիտաժողովը թույլ կտա որոշակիորեն փոխել իրավիճակը: Մեզ համար դա կարևորագույն խնդիր է»,- ընդգծեց Սուրեն Մանուկյանը:

Հայոց ցեղասպանության թանգարան-ինստիտուտի փոխտնօրենը հավելեց, որ գիտաժողովը նաև կարող է զարկ տալ հենց Մոսկվայում Հայոց ցեղասպանության ուսումնասիրման հարցին: Այն կարող է հետաքրքրություն առաջացնել մոսկվաբնակ հայ երիտասարդների մոտ՝ Հայոց ցեղասպանության թեման իրենց հետազոտության առարկա դարձնելու համար:

«Գիտաժողովն մասնակցելու են աշխարհի 15 երկրից մոտ երեք տասնյակ անվանի հայագետներ և ցեղասպանագետներ, այդ թվում՝ Ցեղասպանագետների միջազգային ընկերակցության երկու նախագահներ՝ ներկայիս նախագահ Էնդրյու Վուլֆորդը և նախկին նախագահ Ալեք Հինթոնը», - հայտնեց Սուրեն Մանուկյանը:

Երկօրյա գիտաժողովում հնչելու են զեկույցներ տարբեր ցեղասպանությունների մասին, հատկապես Հայոց ցեղասպանության պատմության և վավերագրերի, Մեծ եղեռնի և դրա հետևանքների հաղթահարման ժամանակ Հայ առաքելական եկեղեցու դերի, Հայոց ցեղասպանության ճանաչման իրավական դիտանկյունների մասին, գրականության, կերպարվեստի, կինոարվեստի, երաժշտության մեջ Հայոց ցեղասպանության թեմայի արտացոլման և այլ արդիական խնդիրների վերաբերյալ:

Միջազգային գիտաժողովի կազմակերպիչներն են Հայոց ցեղասպանության թանգարան-ինստիտուտը և Հայ առաքելական եկեղեցու Նոր Նախիջևանի ու Ռուսաստանի հայոց թեմը: