365.91
Մոսկվայում տեղի ունեցել Հայոց ցեղասպանության 100-րդ տարելիցին նվիրված համերգ
1 րոպեի ընթերցում
ԵՐԵՎԱՆ, 24 ՍԵՊՏԵՄԲԵՐԻ, ԱՐՄԵՆՊՐԵՍ: Հայ Առաքելական եկեղեցու Ռուսաստանի և Նոր Նախիջևանի Հայոց թեմի եկեղեցական համալիրի հանդիսավոր ընդունելությունների դահլիճում տեղի է ունեցել ճապոնացի դաշնակահար Տակահիրո Ակիբայի մենահամերգը` նվիրված Հայոց ցեղասպանության 100-րդ տարելիցին: Ինչպես «Արմենպրես»-ին տեղեկացրին ՀՀ արտաքին գործերի նախարարության լրատվական ծառայությունից, միջոցառումը կազմակերպվել էր ՀՀ սփյուռքի նախարարության նախաձեռնությամբ, Ռուսաստանում ՀՀ դեսպանության և Հայ Առաքելական եկեղեցու Ռուսաստանի և Նոր Նախիջևանի Հայոց թեմի աջակցությամբ:
Միջոցառմանը ելույթի խոսքով հանդես է եկել «Ռուս-հայկական համագործակցություն» կազմակերպության նախագահ Յուրի Նավոյանը:
Համերգի ընթացքում Տակահիրո Ակիբային հանձնվել է ՀՀ սփյուռքի նախարարության պատվոգիրը:
Ճապոնացի տաղանդաշատ երաժիշտը համերգներով հանդես է եկել նաև Ճապոնիայում, Էստոնիայում և Հայաստանում: Վերջերս ՀՀ սփյուռքի նախարարության աջակցությամբ Երևանի Կոմիտասի անվան կամերային երաժշտության տանը կազմակերպվել է Տակահիրո Ակիբայի «Կոմիտասի երկրում» խորագրով համերգը, որի ընթացքում նրա կատարմամբ հնչել են հայ կոմպոզիտորների ստեղծագործությունները:
Բաժանորդագրվեք մեր ալիքին Telegram-ում