Լիոնում թուրք հյուպատոսը հարձակվել է հայ երիտասարդների վրա
1 րոպեի ընթերցում
![Լիոնում թուրք հյուպատոսը հարձակվել է հայ երիտասարդների վրա](http://armenpress.am/resized/480/static/news/b/2015/06/809164.jpg)
ԵՐԵՎԱՆ, 16 ՀՈՒՆԻՍԻ, ԱՐՄԵՆՊՐԵՍ: Լիոնի կենտրոնական «Բելքուղ» հրապարակում«Հյուպատոսական տոնակատարություններ» ամենամյա միջոցառման ժամանակ հայ երիտասարդները ներկաների ուշադրությունը հերթական անգամ ցանկացել են հրավիրել Հայոց ցեղասպանության հարցում թուրքական ժխտողականության վրա: Հայ երիտասարդների բողոքի ակցիան, սակայն, խաղաղ ընթացք չի ունեցել:
Ինչպես հաղորդում է «Արմենպրես»-ը` վկայակոչելով «Ասպարեզ» պարբերականը, Հայ հեղափոխական դաշնակցության երիտասարդական թևը համարվող «Նոր սերունդ» կազմակերպության անդամները նստացույց են իրականացրել Ֆրանսիայում Թուրքիայի գլխավոր հյուպատոսության տաղավարի առջև, որտեղ էլ հարձակման են ենթարկվել հյուպատոսարանի աշխատակիցների և անձամբ հյուպատոս Հիլմի Էգե Թյուրեմենի կողմից:
Հյուպատոսարանի անվտանգության աշխատակիցները նախ սկսել են հորդորել հայ երիտասարդներին դադարեցնել ցույցը, ինչից հետո, տեսնելով, որ հայ երիտասարդներն անդրդվելի են, դիմել են բռունցքների օգնությանը: