Հալեպահայերը չեն ցանկանում տեղահանվել
2 րոպեի ընթերցում
![Հալեպահայերը չեն ցանկանում տեղահանվել](http://armenpress.am/resized/480/static/news/b/2015/06/808028.jpg)
ԵՐԵՎԱՆ, 5 ՀՈՒՆԻՍԻ, ԱՐՄԵՆՊՐԵՍ: Հալեպի հայ համայնքը գրեթե կազմաքանդված վիճակում է, սակայն այնտեղ ապրող փոքրաթիվ հայերը չեն ցանկանում լքել իրենց տունն ու տեղահանվել:
«Արմենպրես»-ի փոխանցմամբ, ՍԴՀԿ Հայաստանի վարչության փոխատենապետ, հալեպահայ Վազգեն Մեսրոպյանի տվյալներով, այս պահին Հալեպում 15.000 հայ է բնակվում: Նրանք ստիպված են մնալ Հալեպում, որովհետեւ Հալեպից հեռանալու հնարավորություններ չունեն: «Հալեպահայերը դեմ են տեղահանությանը: Չենք ուզում տեղահանվել, չենք ուզում թուրքական քաղաքականությանը հետեւել: Տեղահանումը թուրքական քաղաքականության արդյունքն է, երկրորդ, երրորդ անգամ չենք ուզում տեղահանվել»,- ասաց նա:
Հալեպի Կիլիկյան ճեմարանի տնօրեն Անի Մելքոնյան-Բոյաջյանն էլ շեշտում է, որ վերջին չորս տարում Հալեպն ամենաշատ վնասված գաղութն է, և դպրոցներից շատերը փակվել են աշակերտների թվաքանակի կտրուկ նվազման հետեւանքով: «Մեր ճեմարանն անընդհատ ռմբակոծվում էր, և վախեցանք, վարժարանից դուրս եկանք ու դասերը շարունակեցինք ավելի ապահով վայրում՝ մեր ակումբում: Էլեկտրական հոսանք չունենք, մոմերի տակ ենք դաս անում, ջերմության միջոցներ չունենք: Հալեպում մնացած ընտանիքները շատ վատ վիճակում են, ինչ ունեին՝ վաճառել են ու քնում-արթնանում են ռմբակոծության տակ, իսկ ռմբակոծումները ավելի են շատացել: Շատերը չեն կարողանում գնալ, որովհետեւ միջոց չունեն: Այլեւս անհնար է դիմանալ, վախի ու սարսափի մեջ ենք ապրում»,- ասաց նա:
Նրա խոսքով, չնայած Հալեպի վրա հարձակումներին, որոշ դպրոցներ շարունակում են աշխատանքը. երբ սկսում է ռմբակոծումը, աշակերտներին իջեցնում են մառան, հետո զանգում ընտանիքներին, որ գան տանեն: