3 րոպեի ընթերցում
ՎԱՇԻՆԳԹՈՆ, 30 ՄԱՅԻՍԻ, ԱՐՄԵՆՊՐԵՍ: Միացյալ Նահանգների Հետաքննությունների դաշնային բյուրոն հետաքննություն է սկսել Ներկայացուցիչների պալատի նախկին խոսնակ Դենիս Հասթերթի դեմ՝ նրան մեղադրելով ՀԴԲ-ին ստելու և բանկային հաշվետվություններից խուսափելով համակարգված կերպով գումարներ կանխիկացնելու մեջ: «Արմենպրես»-ի փոխանցմամբ՝ այս մասին տեղեկացնում է անգլալեզու «Մասիս փոստ» շաբաթաթերթի էլեկտրոնային տարբերակը:
73-ամյա ամերիկացի նախկին կոնգրեսականը ներկայումս լոբբիստական գործունեություն է ծավալում Թուրքիայի համար Վաշինգթոնում: Իլինոյս նահանգի հյուսիսային շրջանի փաստաբանի ներկայացրած մեղադրական ակտում նշվում է, որ Հասթերթը վճարել է մի անհայտ անձի՝ «նախկինում այդ մարդու դեմ կատարած թերացումները թաքցնելու և փոխհատուցելու» համար: Մեղադրող կողմի համաձայն` 2010- 2014 թվականների ընթացքում ԱՄՆ նախկին օրենսդիրը այդ անձին վճարել է մոտ 1.7 միլիոն դոլար:
Դենիս Հասթերթը վատ համբավ ունի նաև Հայոց ցեղասպանության ճանաչման դեմ ուղղված իր գործունեությամբ: 2000 թվականի հոկտեմբերին նրա ձեռնարկած գործողությունների հետևանքով չընդունվեց Հայոց ցեղասպանության ճանաչման բանաձևը: Լինելով ԱՄՆ ներկայացուցիչների պալատի խոսնակ՝ նա խոստացել էր աջակցել բանաձևի ընդունմանը, սակայն քվերակության նախօրեին հանել էր բանաձևի քննարկումն օրակարգից` պարզաբանելով, որ նման խնդրանքով նամակ է ստացել նախագահ Բիլ Քլինթոնից, և բանաձևը կվնասի ԱՄՆ շահերին:
2005 թվականի սեպտեմբերին «Vanity Fair» ամսագիրը բացահայտել էր, թե ինչպես է ՀԴԲ թարգմանիչ Սիբել Էդմոնդսն իր աշխատանքային գործունեության ընթացքում թուրքերեն ձայնագրություն լսել, որտեղ զրուկացիները պարծենում էին Հասթերթի հետ ունեցած իրենց կապերով: Ամսագրի հաղորդմամբ՝ ձայնագրությունից պարզ է դառնում, որ Հասթերթին տասնյակ հազարավոր դոլարներ են մուծել տեղեկատվության փոխանակման և «քաղաքական լավության» համար: Զրուցակիցներից մեկը եղել է Թուրքիայի հյուպտոսարանի պաշտոնյա, ով ձայնագրությունում պնդել է, որ Հայոց ցեղասպանության բանաձևը օրակարգից հանելու համար Հասթերթին պետք է վճարվի առնվազն 500 հազար դոլար:
Կոնգրեսական գործունեությունից հետո Հասթերթն ամսական 35,000 դոլար է ստացել Թուրքիայի օգտին լոբբինգով զբաղվելու համար: