Ստամբուլում քանդվող հայկական որբանոցի տերը համաձայն է բանակցել

ԵՐԵՎԱՆ, 8 ՄԱՅԻՍԻ, ԱՐՄԵՆՊՐԵՍ: Ստամբուլի Թուզլա թաղամասում գտնվող «Արմեն ճամբար» անունով հայտնի հայկական որբանոցի ներկայիս սեփականատերերը շենքի քանդման դեմ սկսված պայքարի արդյունքում հայտնել են, որ առժամանակ դադարեցնում են քանդման աշխատանքները և պատրաստ են առաջարկների: Ինչպես հաղորդում է «Արմենպրես»-ը, այս մասին տեղեկացնում է «Ակոս» պարբերականը:

Թուրքիայում կայանալիք խորհրդարանական ընտրություններում առաջադրված հայազգի թեկնածու Գարո Պայլանը հանդիպել է որբանոցի ներկայիս տիրոջ` Ֆաթիհ Ուլուսոյի հետ, ով էլ հայտնել է, որ այս պահին դադարեցնում է քանդման աշխատանքները և պատրաստ է շինության շուրջ առաջացած խնդրի վերաբերյալ ցանկացած տեսակի առաջարկի: Պայլանը նշել է, որ իրենք պահանջել են դադարեցված համարել քանդման աշխատանքները, քանի դեռ որևէ լուծման բանաձև չի գտնվել:

Ստամբուլում մայիսի 6-ին բուլդոզերները և հատուկ մեքենաները սկսել են քանդել հայ որբերի «Արմեն ճամբար» ամառային որբանոցը: Դրա դեմն առնելու նպատակով Թուրքիայում գործունեություն ծավալող մի շարք կազմակերպություններ և պարզապես անհատներ շտապել են այնտեղ` կասեցնելու որբանոցի շենքի կործանումը: Ներկայում որբանոցի շենքի քանդումը մասամբ դադարեցված է: Շինության վրա տարբեր պաստառներ են փակցված և գրություններ են արված: «Արմեն ճամբար»-ի տարածքում նաև մարդիկ են հերթապահում:

Գեդիքփաշայի հայկական որբանոցին կից «Արմեն ճամբար» ամառային որբանոցը կառուցվել է հայ որբերի աշխատանքով: Ճամբարում բնակվող երեխաները մասնակցել են շինարարական աշխատանքներին: Նրանք ավազ են կրել ծովից, որով էլ կառուցվել է այն: «Արմեն ճամբար» որբանոցը թուրքական պետության որոշումով փակվել է 1983 թվականին: Իշխանությունները երբեք թույլ չեն տվել որբանոցի վերանորոգում, ինչի պատճառով այն գտնվում է անմխիթար վիճակում: Թուրքիայում 2011 թվականին օրենք է ընդունվել ազգային փոքրամասնություններին պատկանող հիմնադրամների 79 տարի բռնագրավված անշարժ գույքը վերադաձնելու մասին, սակայն, Գեդիքփաշայի հայկական որբանոցին կից այդ ամառային ճամբար-մանկատունը չի ընդգրկվել օրենքով վերադարձման ենթակա գույքի ցուցակում: 5.552 հազար քմ տարածք ունեցող որբանոցը 1961 թվականին գնել է Հայ բողոքական եկեղեցու հիմնադրամը: Մանկատան հողատարածքի սեփականատեր Սեիթ Դուրմազի երեխաներից մեկը հետագայում հաջողացրել է որբանոցից 600 քմ տարածք գնել: 1974 թվականին այդ տարածքը գնած կապալառուի կողմից բացված դատական գործընթացի արդյունքում նա կարողացել է զարտուղի ճանապարհով ճամբարի տարածքը կցել իր կողմից գնված 600 քմ-ին: 1977 թվականին փոքրամասնությունների հիմնադրամների մասին ընդունված նոր օրենքով հայ որբերի ճամբարը բռնագրավվել է:

Ճամբարն այս ընթացքում անցել է տարբեր տերերի ձեռքով: Վերջինն այն գնել է Թուրքիայի ֆուտբոլի ֆեդերացիայի նախկին նախագահ Մեհմեթ Ալի Այդընլարը: Հետագայում որբանոցի սեփականության իրավունքները մի քանի անգամ փոխվել են Այդընլար ընտանիքի ներսում: Ներկայում դրանք պատկանում են Այդընլար ընտանիքի բարեկամ Էրհան Այդընլարին, սակայն հայկական որբանոցի սեփականության հարցերով զբաղվում է Մեհմեթ Ալի Այդընլարի բարեկամը` Ֆաթիհ Ուլուսոյը: