Արա Աբրահամյանը ԵՏՄ-ին ՀՀ- անդամակցության պայմանագիրը չստորագրելու պատճառներ չի տեսնում

ԵՐԵՎԱՆ, 19 ՍԵՊՏԵՄԲԵՐԻ, ԱՐՄԵՆՊՐԵՍ: Ռուսաստանի հայերի միության նախագահ Արա Աբրահամյանը պատճառներ չի տեսնում Եվրասիական տնտեսական միությանը Հայաստանի անդամակցության պայմանագիրը չստորագրելու համար: Հայրենիք-Սփյուռք 5-րդ համաժողովի ընթացքում լրագրողների հետ զրույցում նա նշեց, որ գործընթացն իր բնականոն հունով առաջ է գնում: «Ամեն ինչ գնում է այնպես, ինչպես պետք է: Գործընթացն իր բնականոն հունի մեջ է»,- «Արմենպրես»-ի հաղորդմամբ՝ ասաց Աբրահամյանը:

Նա ընդգծեց, որ խնդիրներ կան այն առումով, որ Ռուսաստանի նկատմամբ պատժամիջոցներ են կիրառվում, նաև Ուկրաինայում իրավիճակը շարունակում է լարված մնալ, իսկ այս գործոնները չեն կարող Հայաստանի վրա ազդեցություն չունենալ: «Անկախ Եվրասիական տնտեսական միությանը Հայաստանի անդամակցությունից, այս գործոնները չեն կարող չազդել Հայաստանի վրա, քանի որ Ռուսաստանում 2.5 միլիոն հայ է ապրում»,- պարզաբանեց Աբրահամյանը:

Նրա խոսքով` որքան Ռուսաստանը կայուն լինի և զարգանա, այնքան Հայաստանի ամար ավելի լավ կլինի: