Արմեն Մովսիսյանը կոչ է անում պատգամավորներին չխաթարել «Ռոսնեֆտ»-ի հետ բանակցությունների ընթացքը

ԵՐԵՎԱՆ, 25 ՓԵՏՐՎԱՐԻ, ԱՐՄԵՆՊՐԵՍ: Հայաստանի Հանրապետության էներգետիկայի և բնական պաշարների նախարար Արմեն Մովսիսյանն այս պահին նպատակահարմար չի համարում խորհրդարանում «Նաիրիտ»-ի հարցով ժամանակավոր հանձնաժողովի ստեղծումը: Ազգային ժողովում «Նաիրիտ»-ի հարցով ժամանակավոր հանձնաժողով ստեղծելու որոշման նախագծի քննարկման ժամանակ Արմեն Մովսիսյանը նշեց, որ այս պահին «Նաիրիտ»-ում «Ռոսնեֆտ» ընկերության հետ նոր ծրագիր է իրականացվում և պետք չէ խաթարել այդ աշխատանքները: «Վերջապես գտնվել է մի ընկերություն, որը պատրաստ է Հայաստանում 500 միլիոն դոլարի ներդրումներ կատարել, եկեք չխափանենք այդ աշխատանքները»,- «Արմենպրես»-ի հաղորդմամբ՝ նշեց նա:

«Նաիրիտ» գործարանը եղել է Հայաստանի ամենախորշոր ընկերություններից մեկը և, ամենամեծը լինելով, ունեցել է խնդիրներ` թե՛ ԽՍՀՄ-ում և թե՛ ՀՀ-ում: «Ես ողջունում եմ այն ելույթները, որոնք սրտացավորեն միտված են այս վիճակը փրկելուն, բայց այն ելույթները որոնք նպատակաուղղված են քաղաքական երանգ տալ հարցին, դա ուղղակի ընդունելի չէ»,- ասաց Էներգետիկայի և բնական պաշարների նախարարը: Նա ՀՅԴ պատգամավոր Արծվիկ Մինասյանի այն հայտարարության առնչությամբ, ըստ որի` «Նաիրիտը» կանխամտածված սնանկացման են տանում, ասաց, որ եթե կառավարությունը որոշեր սնանկացնել «Նաիրիտ»-ը, ապա տարիներ առաջ սնանկացման միտումները կերևային: Ամենատարբեր գնահատականներ հնչեցին ԱԺ ամբինոնից, որոշ գնահատականներ, նախարարի խոսքով, պահանջում են մասնագիտական պատասխաններ:

Ազգային ժողովը քնարկում է «Նաիրիտ գործարան» փակ բաժնետիրական ընկերության մասնավորեցման, ստանձնած վարկային պարտավորությունների և անհրաժեշտ ծավալով տնտեսական գործունեություն չիրականացնելու պատճառներն ուսումնասիրող Հայաստանի Հանրապետության Ազգային ժողովի ժամանակավոր հանձնաժողով ստեղծելու մասին» որոշման նախագիծը: ԱԺ տնտեսական հարցերի մշտական հանձնաժողովը փետրվարի 19-ին բացասական եզրակացություն էր տվել որոշման նախագծին, ինչից հետո ՀՅԴ խմբակցությունն այն ներկայացրել էր արտահերթ քննարկման:

Ռուսական «Ռոսնեֆտ» ընկերությունը Հայաստանում կիրականացնի շուրջ 500 միլիոն դոլարի ներդրումներ, որոնց ուղղությամբ աշխատանքների մասին զեկուցվել է Սոչիում ՀՀ վարչապետ Տիգրան Սարգսյանի ու ՌԴ վարչապետ Դմիտրի Մեդվեդևի հանդիպման ժամանակ: ՀՀ վարչապետը նշել է, որ ներդրումները առնչվում են նաև «Նաիրիտ» գործարանին. նոր ստեղծվելիք գործարանում հիմնականում աշխատելու են «Նաիրիտ»-ի ներկայիս աշխատակիցները: