Հայ մարզիկները Սոչիում կմեկնարկեն փետրվարի 9-ին. նրանք արդեն դոպինգ-թեստեր են անցել
2 րոպեի ընթերցում
![Հայ մարզիկները Սոչիում կմեկնարկեն փետրվարի 9-ին. նրանք արդեն դոպինգ-թեստեր են անցել](http://armenpress.am/resized/480/static/news/b/2014/01/747260.jpg)
ԵՐԵՎԱՆ, 23 ՀՈՒՆՎԱՐԻ, ԱՐՄԵՆՊՐԵՍ: Սոչիում կայանալիք օլիմպիական ձմեռային խաղերում Հայաստանի մարզիկները կմեկնարկեն փետրվարի 9-ին: Այս մասին «Արմենպրես»-ին տեղեկացրին Հայաստանի ազգային օլիմպիական կոմիտեի մամուլի ծառայությունից:
Նրանցից 3-ը հանդես կգա դահուկային սպորտում: Սերգեյ Միքայելյանը , ում մարզիչն Է հայրը` Արթուր Միքայելյանը, կմասնակցի 15 կիլոմետր դասական, ազատ եւ սքիաթլոն ոճի եւ 50 կմ ազատ ոճ մրցավազքի: Փետրվարի 9-ին ժամը 14.00-16.00-ը նա կմասնակցի սքիաթլոն՝ 15x15-ի մրցավազքին, փետրվարի 11-ին նույն ժամին՝ արագավազք, փետրվարի 14-15-ին՝ դասական ոճի մրցավազքին, իսկ 23-ին՝ ժամը 11-ին՝ ազատ ոճի մրցավազքին: Դահուկորդ Արթուր Եղոյանը կմասնակցի նույն մրցումներին` բացի 50 կմ ազատ ոճ մրցաձեւից:
Գյումրեցի դահուկորդուհի Կատյա Գալստյանը կմասնակցի փետրվարի 12-ին ժամը14.00-15.40 մեկնակրող 10 կմ դասական ոճ մրցաձեւին: Գալստյանի մարզիչն է Սլավա Սարգսյանը:
Լեռնադահուկային սպորտում Հայաստանը կներկայացնի ամերիկահայ Արման Սերեբրակյանը: Նա փետրվարի 19-ին եւ 23-ին հանդես կգա հսկա եւ հատուկ ոլորավայրԷջքում: Նրա մարզիչն Է Սեյրան Հարությունյանը:
Բոլոր հայ օլիմպիականները դոպինգ-թեստեր են անցել Հայաստանի հակադոպինգային ծառայությունում, որոնք ուղարկվել են Ավստրիայում գտնվող հատուկ հակադոպինգային լաբորատորիա` Արդյունքները պարզելու համար:
ՀԱՕԿ-ը Միջազգային օլիմպիական կոմիտե է ուղարկել նշված մարզիկների մասնակցության հայտը:
Սոչիի օլիմպիական խաղերը կանցկացվեն փետրվարի 7-23-ը: