Հաջորդ տարվա բյուջեով գիտությանը հատկացվող ֆինանսավորումը ավելացել է 11.3 տոկոսով /լրացված/
4 րոպեի ընթերցում
ԵՐԵՎԱՆ, 30 ՀՈԿՏԵՄԲԵՐԻ, ԱՐՄԵՆՊՐԵՍ: Հայաստանի կառավարությունը հետեւողականորեն ավելացնում է գիտության ոլորտին տրվող բյուջետային հատկացումները: Գիտության համար նախատեսված գումարները 2014 թվականի բյուջեով աճել են 11.3 տոկոսով: Այս մասին նշեց ՀՀ ֆինանսների նախարարի տեղակալ Պավել Սաֆարյանն Ազգային ժողովում գիտության, կրթության, մշակույթի եւ երիտասարդության հարցերի, ֆինանսավարկային եւ բյուջետային հարցերի մշտական հանձնաժողովների համատեղ նիստի ժամանակ: «Անկախ մեր ունեցած ֆինասական ավելացումներից և պակասեցումներից, անկախ մեր առջև ծառացած խնդիրներից` գիտության համար տրվող հատկացումները պետք է ավելացվեն` նախորդ բյուջետային տարվա համեմատ եկամուտների ավելացման տոկոսի չափով: Միակ պաշտպանված ոլորտը գիտությունն է: Ազգային ժողովի կողմից ընդունված հաշվետվության համաձայն` ոլորտի եկամուտների աճը կազմելու է 11.3 տոկոս, որով պայմանավորված` նույնքանով ավելացվել է գիտության համար տրվող գումարի չափը»,- «Արմենպրես»-ի հաղորդմամբ` ասաց փոխնախարարը` նշելով, որ 2014-ին գիտության ոլորտի ծախսերի համար նախատեսված է 12 միլիարդ 789 միլիոն դրամ, որը 1 միլիարդ 270 միլիոն դրամով ավելի է նախորդ տարվա հատկացումից:
Պավել Սաֆարյանի հավաստմամբ` գիտության ոլորտին հատկացվող գումարների զգալի մասը, ինչպես նախորդ տարիներին, այս տարի ևս ուղղվելու է գիտության բազային ֆինասավորմանը: «9 միլիարդ 25 միլիոն դրամն ուղղվելու է բազային ֆինանսավորմանը, որը 676 միլիոն դրամով ավելի է նախորդ տարվա հատկացումից: Պայմանագրային ֆինանսավորման համար նախատեսված գումարների չափը հաջորդ տարի կազմելու է 1 միլիարդ 515 միլիոն դրամ: Այս գումարի մի մասը 277 միլիոնը տրամադրվելու է շարունակական պայմանագրային թեմաների ֆինանսավորմանը, իսկ մնացածը մասը` մրցույթներով հաստատվող նոր թեմաների ֆիանսավորմանը»,-ասաց Պավել Սաֆարյանը: ՀՀ ֆինանսների փոխնախարարի հաղորդմամբ` գիտաշխատողների գիտական աստիճանների համար հավելավճարներ տրամադրելու համար նախատեսվել է 446 միլիոն դրամ` ընթացիկ տարվա 441 միլիոն դրամից դիմաց, ինչը պայմանավորված է գիտական թեմաներում ներգրավված գիտաշխատողների թվի ավելացմամբ: Ծախսերը հաշվարկվել են 770 դոկտորների և 2180 գիտության թեկնածուների հաշվով: Դոկտոների հատկացվող գումարը 20 հազար դրամ է, իսկ թեկնածուներինը` 10 հազար դրամ:
ՀՀ կրթության և գիտության նախարար Արմեն Աշոտյանն ընդգծեց, որ Հայաստանում գիտնականների աշխատավարձերը պետք է ավելի բարձր լինեն, սակայն պետությունը ֆինանսավորում է իր հնարավորությունների սահմաներում: «Մեզ համար սա իսկապես ցավոտ թեմա է, քանի որ գիտնականները արժանի են ավելի բարձր վարձատրության»,- ասաց նա:
Աշոտյանն ընդգծեց, որ մյուս կողմից արդյունավետ գիտնականը կարողանում է դիմել պետական ֆինանսավորման այլ ծրագրերի: «Ստղծագործ գիտնականները գիտական տարբեր ծրագրեր իրականացնելու համար կարող են օգտվել պետբյուջեից գիտական ծրագրերի համար նախատեսված լրացուցիչ գումարներից, կարողանում են արտասահմանից գրանտներ բերել և իրականացնել այդ գիտական աշխատանքները պետական գիտական ենթակառուցվածքների լաբորատորիաների հիման վրա»,- ասաց նա:
ՀՀ ԿԳ նախարարն ընդգծեց, որ գիտնականները լրացուցիչ գումարներից օգտվելու հնարավորություն ունեն՝ հավելելով, որ ցանկալի է, որպեսզի նրանք ավելի բարձր աշխատավարձ ստանան, ինչի ուղղությամբ կառավարությունն աշխատանքներ տանում է:
Հայաստանի Հանրապետության 2014թ.-ի պետական բյուջեի ծրագրով կրթության ոլորտին կհատկացվի 122 միլիարդ 170 միլիոն դրամ, ինչը 14 միլիարդով ավելի է 2013թ.-ի հատկացումից: