Արևելագետները կոչ են անում բոլոր մակարդակներով ամեն ինչ անել սիրիահայերի անվտանգության համար
4 րոպեի ընթերցում
![Արևելագետները կոչ են անում բոլոր մակարդակներով ամեն ինչ անել սիրիահայերի անվտանգության համար](http://armenpress.am/resized/480/static/news/b/2013/09/731544.jpg)
ԵՐԵՎԱՆ, 3 ՍԵՊՏԵՄԲԵՐԻ, ԱՐՄԵՆՊՐԵՍ: Սիրիայի 40-60 հազար հայ բնակչությունը հայտնվել է ծանրագույն վիճակում: Ինչպես հաղորդում է «Արմենպրես»-ը, այսպիսի տեսակետ հայտնեց արաբագետ Արաքս Փաշայանը: «Արդեն հինգերորդ օրն է, որ Հալեպը չունի ինտերնետային և հեռախոսային կապ, քաղաքը գտնվում է շրջափակման մեջ, ապահովված չեն ոչ միայն հալեպահայերի, այլև ողջ սիրիահայերի անվտանգության հարցրերը»,-նշեց նա: Արաբագետի խոսքերով` բոլոր կառույցները` պետական, կրոնական, քաղաքական ու կուսակցական, պետք է պատասխանատվություն կրեն սիրիահայերի ապահովության համար: «Այն բոլոր կառույցները, որոնք պնդում էին և վտահեցնում, որ ամեն ինչ կանեն սիրիահայերի անվտանգության համար, այսօր պետք է հասկանան, թե ինչ է արվել և ինչ պետք է արվի: Այն օգնությունը, որը ծրագրվում է նրանց տարհանելու համար, կարող է ուշացած լինել, շատերը կցանկանային դուրս գալ Սիրիայից, բայց չունեն անհրաժեշտ միջոցներ, բայց պետք է հաշվի առնել նաև, որ ոչ բոլորն են ցանկացել հեռանալ իրենց տներից»,-ասաց Արաքս Փաշայանը:
Արաբագետ Արաքս Փաշայանը, անդրադառանալով սիրիահայության տարհանման ձևերին, նշեց, որ ներկայիս շրջափակման պայմաններում չի պատկերացնում այն ուղին, որով հնարավոր կլինի սիրիահայերի անվտանգ դուրսբերումը երկրից: «Ես չեմ պատկերացնում, թե նրանց ինչպես պետք է տարհանել. երևի թե ռուսական նավերով, այլ տարբերակ չկա»,-ասաց նա:
Արևելագետ Սուրեն Մանուկյանն էլ կարծում է, որ Սիրիային ուղղված հարվածները կանդրադառնան նաև Լիբանանի վրա: Սիրիայում ռազմական միջամտության դեպքում Հայաստանը պետք է պատրաստ լինի ընդունել ոչ միայն սիրիահայերին, այլ լիբանանահայերին: «Ամենավատատեսական սցենարի դեպքում` «Հեզբոլահ»-ը կհարվածի Իսրայելին, որն էլ նորից զորք կմտցի Հարավային Լիբանան, ինչպես դա արեց 2006-ին, Բեյրութը կռմբակոծի: Ավելի մեղմ սցենարի դեպքում` Լիբանանում արդեն մեկ միլիոն փախստական սիրիացիներին կմիանան այլ փախստականներ, այդ թվում` հայեր: Այդ ամենը կբերի Լիբանանի ներսում ճնշումների, սոցիալական խնդիրների գլուխ բարձրացման».-ասաց Սուրեն Մանուկյանը:
ԱՄՆ-ի նախագահ Բարաք Օբաման հայտարարել է, որ կսպասի Կոնգրեսի որոշմանը` Սիրիայի տեղային հարվածներ հասցնելու համար: ԱՄՆ Կոնգրեսն այս օրերին գտնվում է արձակուրդում և աշխատանքի կվերադառնա սեպտեմբերի 9-ին: Ողջ համաշխարահային հանրությունն սպասում է Սիրիայում դեպքերի զարգացմանը:
Սիրիայում իրավիճակը սրվել էր օգոստոսի 21-ին, երբ լրատվամիջոցները հայտնեցին Դամասկոսի արվարձաններում քիմիական զենքի օգտագործման մասին: Նախնական տվյալներով, հարձակմանը զոհ է գնացել 600 մարդ: Ըստ որոշ տեղեկությունների` զոհերի թիվը կարող է հասնել մինչեւ 1300-ի: Միջադեպից հետո Սիրիայի կառավարական ուժերը եւ ընդդիմադիրները ոչ մեկ անգամհայտարարեցին զենքի կիրառմանն իրենց չմասնակցելու մասին` միմյանց մեղադրելով դրանում: Սիրիայի կառավարությունն օգոստոսի 25-ին թույլատրել է ՄԱԿ-ի փորձագետներին այցելել քիմիական հարձակման հնարավոր վայրերը: Փորձագետները Սիրիան լքել են օգոստոսի 31-ին՝ իրենց հետ տանելով փորձանմուշները: