2 րոպեի ընթերցում
ԵՐԵՎԱՆ, 26 ՀՈՒՆԻՍԻ, ԱՐՄԵՆՊՐԵՍ: Սիրիահայ համայնքի լուծարման հարցը քննարկման առարկա է դառնում այդ երկրում տեղի ունեցող իրադարձությունների զարգացմանը զուգընթաց:«Արմենպրես»-ի հետ զրույցում արաբագետ Արաքս Փաշայանը դժվարանում է միանշանակ ասել` սիրիահայ համայքնը կցրվի, թե ոչ: «Լուծարվելու դեպքում Հայաստանը Մերձավոր Արեւելքում կկորցնի իր ներկայությունը:Համայնքի քայքայումից անհրաժեշտ է հնարավորինս խուսափել` չնայած շատերն ասում են` թող լքեն Սիրիան, քանի որ այնտեղ ապագա չունեն»,-նկատեց Փաշայանը:
Անդրադառնալով Սիրիայում Բնապահպանության հայազգի նախարարի նշանակմանը` արաբագետը նշեց, որ այս փուլում լավ կլիներ, որ հայերն ավելի աննկատ մնային: «Համայնքում ցանկացած հայի նշանակումն իր մեջ վտանգ է պարունակում: Շատ հնարավոր է, որ ընդդիմադիրները վրեժ են լուծում հայերից` սպանելով համայնքի անդամներին»,-ընդգծեց նա: Արաբագետը դժվարանում է կանխատեսել, թե որքան կտեւի սիրիական այս խառնաշփոթը, քանի որ «երբ ամեն բան նոր էր սկսվել, փորձագետներն ասում էին, որ Ասադին հաշված օրեր են մնացել»: Այնուհանդերձ, ժամանակը ցույց տվեց, որ այդ կանխատեսումներն անհիմն էին: «Հիմա էլ դժվար է ասել, թե ճգնաժամը երբ կհանգուցալուծվի կամ ինչքան ժամանակ կկարողանա գոյատեւել վարչակարգը, որովհետեւ Բաշար Ասադի վարչակարգն աջակիցներ ունինաեւ միջազգային շրջանակներում»,-ընդգծեց նա:Արաբագետը վստահ է, որ Քոֆի Անանի ծրագիրը չէր կարող նպաստել դեպքերի բարդությունից խուսափելուն, քանի որ այն «պարզապես ձախողված էր»: Ծրագրի ժամկետներն անցել են. ապրիլի 12-ին պետք է հրադադար լիներ, սակայն դրանից հետո մի քանի անգամ խախտվել է այդ ռեժիմը:
Սիրիայում կառավարական ուժերի եւ զինված ապստամբների միջեւ բախումների զոհ են դարձել հայկական համայնքի վեց ներկայացուցիչներ: