1 րոպեի ընթերցում
ԵՐԵՎԱՆ, 8 ՆՈՅԵՄԲԵՐԻ, ԱՐՄԵՆՊՐԵՍ: Ցորենի ցանքատարածություններն այս տարի հանրապետությունում ավելացել են 15 հազար հեկտարով' նախորդ տարվա 75 հազարի դիմաց: Ինչպես լրագրողների հետ հանդիպման ժամանակ երեքշաբթի նշեց Գյուղատնտեսության փոխնախարար Սամվել Գալստյանը, դրան նպաստել է հատկապես Ռուսաստանի Դաշնությունից ներկրված 950 տոննա ցորենի էլիտա տեսակի սերմացուն, որը գյուղացիներին է բաժանվել մեկին երկու փոխհարաբերությամբ. այն ամբողջությամբ հետ է վերադարձվել:
«Եթե նախորդ տարի մեկ հեկտարից ցորենի միջին բերքատվությունը կազմում էր 20,19 ցենտներ, ապա այս տարի այն 28,6 ցենտներ էր»,- ասաց փոխնախարարը: Նրա խոսքով' այս տարի ցորենի արտադրության ոլորտում կանխատեսվում է շուրջ 15 տոկոս աճի տեմպ, իսկ եթե հաջորդ տարիներին էլ այսպես շարունակվի,
ապա 2014 թվականին հացահատիկային արտադրությունը կհասցվի Հայաստանի Հանրապետության պահանջարկի 55 տոկոսին: