Ցաբրնոխ. «ԼՂ խնդրում ԵՄ-ն լիարժեքորեն աջակցում է Մինսկի խմբի եզրակացություններին»
1 րոպեի ընթերցում
ԵՐԵՎԱՆ, 3 ՆՈՅԵՄԲԵՐԻ, ԱՐՄԵՆՊՐԵՍ: Լեռնային Ղարաբաղի հիմնախնդրի կարգավորման գործընթացում Եվրոպական միությունը լիարժեքորեն օժանդակելու է Մինսկի խմբի եզրակացություններին: Այսօր այս մասին լրագրողների հետ հանդիպման ժամանակ հայտարարեց Հայաստան-ԵՄ խորհրդարանական համագործակցության հանձնաժողովի եվրոպական կողմի համանախագահ Միլան Ցաբրնոխը: Նա շեշտեց, որ հայ եւ եվրոպացի պատգամավորները համաձայնել են, որ Լեռնային Ղարաբաղի խնդրում միակ հնարավոր լուծումը խաղաղ ճանապարհն է' բացառելով ուժի կիրառումը: «Համաձայնել ենք, որ ստատուս քվոն ընդունելի չէ, եւ մենք բոլորս կուզենայինք ավելի շատ առաջընթաց տեսնել դեպի խնդրի խաղաղ կարգավորումը»,- ընդգծեց եվրոպացի պատգամավորը:
Հանձնաժողովի հայկական կողմի համանախագահ, ՀՀ Ազգային ժողովի եվրաինտեգրման հարցերի մշտական հանձնաժողովի նախագահ Նաիրա Զոհրաբյանը նշեց, որ երկու կողմերը համաձայնել են' միջազգային իրավունքի բոլոր նորմերն իրավահավասար են, եւ նրանցից որեւէ մեկը գերակայություն չունի մյուսի նկատմամբ: