2 րոպեի ընթերցում
ԵՐԵՎԱՆ, 31 ՀՈԿՏԵՄԲԵՐԻ, ԱՐՄԵՆՊՐԵՍ: Մայրական կաթով կերակրված երեխաներն ավելի առողջ են: Ինչպես այսօր լրագրողների հետ հանդիպման ժամանակ ասաց ՀՀ առողջապահության նախարարության Մոր եւ մանկան առողջության վարչության պետ Կարինե Սարիբեկյանը, միջազգային նորմերի համաձայն' երեխային պետք է մայրական կաթով կերակրել առնվազն վեց ամիս:
Վարչության պետի խոսքով' ամենակարեւորը երեխայի կյանքի առաջին տարիներն են: «Կրծքով կերակրվող երեխաների մոտ տասը տոկոսով կրճատվում են մահացության դեպքերը: Մայրական կաթով սնվող երեխաները 7 անգամ քիչ են մահանում ու հիվանդանում»,- նշեց Սարիբեկյանը' ընդգծելով, որ Հայաստանում պաշտոնական վիճակագրությունը փաստում է, որ մինչեւ մեկ տարեկան երեխաների 80 տոկոսը 4 ամիս մայրական կաթով է սնվում, սակայն այս ցուցանիշը եւս գոհացուցիչ չէ:
Ինչպես նշեց մանկաբույժ Սուսաննա Հարությունյանը, Հայաստանում տարեկան 60 երեխայի կյանք կարելի է փրկել կրծքով կերակրման արդյունքում: Ըստ նրա' կրծքով կերակրված երեխայի ու կերակրող մոր առողջությունն այս դեպքում ավելի պաշտպանված է: «Մայրական կաթով սնված երեխաների մտավոր ունակություններն ավելի լավն են: Ուստի պետք է երեխաներին գոնե վեց ամիս կերակրել կրծքով»,- ընդգծեց Հարությունյանը' հավելելով, որ եթե դա հնարավոր չէ, ապա պետք է կաթը փոխարինել կենդանականով, բայց ոչ կաթնախառնուրդներով: