Ռուսաստանը մինչեւ տարեվերջ կարող է դառնալ Առեւտրի համաշխարհային կազմակերպության անդամ
1 րոպեի ընթերցում
![Ռուսաստանը մինչեւ տարեվերջ կարող է դառնալ Առեւտրի համաշխարհային կազմակերպության անդամ](http://armenpress.am/resized/480/static/news/b/2011/10/667211.jpg)
ԵՐԵՎԱՆ, 28 ՀՈԿՏԵՄԲԵՐԻ, ԱՐՄԵՆՊՐԵՍ: Վրաստանը պատրաստ է համաձայնել Ռուսաստանի անդամությանն Առեւտրի համաշխարհային կազմակերպությանը, եթե վերջինս ընդունի շվեյցարական միջնորդների մշակած առաջարկները: Խոսքը Ռուսաստանի եւ Վրաստանի միջեւ հարավօսական եւ աբխազական սահմանահատվածների վերաբերյալ էլեկտրոնային տվյալների փոխանակման մասին է: Ինչպես հաղորդում է «Ինտերֆաքս» գործակալությունը, Վրաստանի փոխարտգործնախարար Թորնիկե Գորդաձեն նախօրեին կայացած ճեպազրույցի ընթացքում հայտարարել է. «Վրաստանը համաձայնել է շվեյցարական կողմի ներկայացրած փոխզիջումային առաջարկին եւ տալիս է համաձայնություն ԱՀԿ-ին Ռուսաստանի անդամակցության համար»:
Շվեյցարական կողմից առաջարկված փոխզիջումային տարբերակը ենթադրում է Ռուսաստանի եւ Վրաստանի միջազգայնորեն ճանաչված սահմանով տեղափոխվող բոլոր բեռների համար միջազգային մոնիթորինգի իրականացում:
Առաջարկի վերաբերյալ Մոսկվան դեռեւս պաշտոնական պատասխան չի տվել: Եթե կողմերը համաձայնության հասնեն, ապա մինչեւ նոյեմբերի 10-ը հնարավոր է ԱՀԿ-ին Ռուսաստանի անդամակցության մասին որոշման ընդունում: